Mańǵystaýlyq munaıshylar kásibı merekelerin atap ótýde
Jýyrda atalmysh merekege oraı Abaı atyndaǵy mádenı demalys kesheninde QR munaı jəne gaz kesheni qyzmetkerleriniń kúnine arnalǵan saltanatty jıyn ótti.
Mańǵystaý oblysy ákimdigibaspasóz qyzmetiniń habarlaýynsha, sharaǵa Mańǵystaý oblysynyń ákimi, memlekettik organ men kásiporyn basshylary, oblystyq máslıhat depýtattary, óńirdiń qurmetti azamattary, ardager-munaıshylar, oblys jurtshylyǵy qatysty.
Elbasynyń tapsyrmasyna sáıkes, qazirgi tańda Mańǵystaýda Qazaqstan munaıynyń 25 paıyzy óndirilip otyr. Bul 18 mln. astam munaı jáne 3 mlrd. tekshe metr tabıǵı gaz. Búginde Qazaqstannyń munaı-gaz kesheni qarqyndy damyp, elimizdiń áleýmettik-ekonomıkalyq órkendeýiniń irgetasyna, qozǵaýshy kúshine aınaldy.
Saltanatty jıynda óńir basshysy Eraly Toǵjanov merekemen oblys turǵyndaryn quttyqtap, elimizdiń munaı-gaz salasyna eleýli úles qosqany úshin birqatar azamattardy oblys ákimdiginiń Qurmet gramotalary jáne Alǵys hattarymen marapattady.
Sonymen qatar, «Qazmunaıgaz» Ulttyq kompanııasy» aktsıonerlik qoǵamynyń Basqarma tóraǵasy Saýat Myńbaev «qara altyn» ıegerýshilerdi tól merekelerimen quttyqtap, «Munaı-gaz keshenin damytýǵa qosqan úlesi úshin» Qazaqstan Respýblıkasy Energetıka mınıstirliginiń medalimen jáne Alǵys hatymen marapattady. Sondaı-aq, elimizdiń munaı-gaz salasyna eleýli úles qosqany úshin birqatar azamattar «Samuryq-Qazyna» ulttyq ál-aýqat qory» aktsıonerlik qoǵamynyń Qurmet gramotasyna ıe boldy.
«Elbasynyń «Bolashaqqa baǵdar: rýhanı jańǵyrý» bastamasy da qoǵamdyq sanany silkindirip, halqymyzǵa rýhanı serpilis ákelgen tusta bizdiń munaıshylarymyzda óz úlesterin qosýda. Táýelsizdiktiń ótken 26 jyly ishinde qazaqstandyq munaıshylar qyrýar jumystar atqardy. Alaıda alda turǵan mindetter odan da zor. Salaǵa tyń tehnologııalar ákelip, jańa ken oryndaryn ıgerý qajet. Munaıdy syrtqa shyǵarý joldaryn keńeıtý men ony óńdeý mindeti de biz úshin ózekti. Elimizdiń munaı-gaz salasynda eńbek etetin azamattar alda turǵan mindetterdi abyroımen atqaryp, ındýstrııalyq-ınnovatsııalyq damýymyzǵa úles qosatynyna senimim mol, - dedi óziniń quttyqtaý sózinde Mańǵystaý oblysynyń ákimi Eraly Toǵjanov.
Qazaqstan Respýblıkasynyń munaı-gaz salasy qyzmetkerleri kúnine arnalǵan saltanatty jıyn sońy merekelik kontsertke ulasty.