Mańǵystaýlyq metsenattar «Týǵan jer» baǵdarlamasyna 12,6 mlrd teńge bóldi

AQTAÝ. QazAqparat – 2019 jyly Mańǵystaý oblysynyń metsenattary 12 mlrd 600 mln teńgeniń jobasyn júzege asyrdy. Bul týraly Óńirlik kommýnıkatsııalar qyzmetinde «Rýhanı jańǵyrý» baǵdarlamasy aıasynda atqarylǵan sharalardy qorytyndylaýǵa arnalǵan brıfıngte Óńirlik jobalyq keńsesiniń basshysy Gúlaıym Azan málim etti, dep habarlaıdy QazAqparat tilshisi.

«Byltyr Mańǵystaý oblysynda kómekke muqtaj onnan astam otbasy demeýshiler qarjysyna salynǵan jańa úılerge kirip, qonys toıyn toılady. Máselen, Mańǵystaý aýdanynda «Ár qazaq – meniń jalǵyzym» atty qaıyrymdylyq aktsııasy aıasynda «Aıtyman» qoǵamdyq qory Shetpe men Qosbulaq aýylyndaǵy az qamtylǵan úsh birdeı otbasyǵa tórt páterli mýnıtsıpaldy úı salyp berdi», - dedi «Rýhanı jańǵyrý» óńirlik jobalyq keńsesiniń basshysy Gúlaıym Azan.

Al, Aqtaýdyń eń shalǵaı aýdany Beıneýdiń 1991 jylǵy túlekteri bir januıaǵa, «Oǵylandy-Beket ata» qoǵamdyq qorynyń ókilderi Qaraqııa aýdanynyń Munaıshy jáne Jetibaı aýylyndaǵy 10 otbasyǵa jańa baspanalardyń kiltin tabystaǵan.

Munaıly aýdanyndaǵy Batyr aýyldyq okrýginde turatyn úsh otbasyǵa «Úmmet jastary» qaıyrymdylyq qory baspana kóterip berse, Túpqaraǵan aýdanyna qarasty Aqshuqyr aýylynyń eki turǵynyna jeke kásipker Isa Bımyrzaevtyń, taǵy bir januıaǵa osy aýyldyń turǵyndary qarajat jınap, záýlim úı turǵyzǵan.

Muqtaj jandarǵa qolǵabys etýge baǵyttalǵan saýapty jumystan aqtaýlyq metsenattar da qalys qalmaǵan. Oblys ortalyǵynda turatyn kópbalaly bir otbasyǵa «K7 Group» seriktestiginiń basshysy Sh.Ermekbaıuly páter syılap qýantsa, taǵy bir januıanyń shańyraǵy «Ońdasynstroı» mekemesiniń qoldaýymen jóndeýden ótken.

Aıta keteıik, óńir azamattary jastar men jasóspirimderdiń bos ýaqytyn tıimdi paıdalaný men buqaralyq sportty damytýǵa da belsendi atsalysyp keledi. Osy kúnge deıin demeýshiler esebinen Mańǵystaý oblysyndaǵy eldi mekenderde jeti birdeı sport kesheni salynyp, balalarǵa arnalǵan 16 oıyn jáne sport alańy qoldanysqa berildi.

Elbasynyń «Rýhanı jańǵyrý» baǵdarlamalyq maqalasynda kórsetilgen «Aýyl - el besigi» jobasy aıasynda jeke jáne zańdy tulǵalardyń qarjy bólýimen «Kórpe-Fest» festıvalinde kópbalaly 15 anaǵa ozyq úlgidegi tigin mashınasy tartý etildi. Sonymen qatar, Qaraqııa aýdanyndaǵy tórt mektepte ınklıýzıvtik bilim berý kabıneti men Jetibaı aýylynda múmkindigi shekteýli balalarǵa bilim berý ortalyǵy ashyldy.

Metsenat qarjysyna Jańaózenge qaraıtyn Teńge, Qyzylsaı jáne Rahat aýylynda ambýlatorııalyq ortalyqqa úsh jedel-járdem kóligi, turǵyndar ıgiligine úsh avtobýs satyp alynǵan.

Osy atalǵan Qyzylsaı men Teńgede, Mańǵystaý aýdanyndaǵy Aqshymyraý, Taýshyq, Ushtaǵan, Shebir eldi mekeninde, Qaraqııaǵa qaraıtyn Senek aýylynda, Beıneý aýdanyndaǵy Sarǵa men Boranqulda turǵyndar men kásipkerler, mektep túlekteriniń demeýshiligimen ózi týǵan aýyldy kórkeıtýde kóptegen ıgi ister atqaryldy.

Jomart júrek azamattardyń aqshalaı qoldaýymen Mańǵystaý aýdanynyń Tuşyqudyq aýylynda «Aıdar Ishan» rýhanııat ortalyǵy jáne Ondy, Qyzyltóbe aýylynda meshit salyndy.

Foto: tumba.kz