Mańǵystaýlyq metsenattar áleýmettik jobanyń iske asýyna 43 mlrd teńge jumsaǵan
Sharanyń maqsaty - kásipkerler men halyq múddesin eskerip, olardyń eńbek pen iskerlik áreketteriniń belsendiligin arttyrý arqyly áleýmettik jobalardy iske asyrý. «Týǵan jer» baǵdarlamasy aıasynda óńirdiń damýyna úles qosyp, eldiń turaqty ekonomıkalyq keńistigin qalyptastyrý.
Elbasy Nursultan Nazarbaev «patrıotızm kindik qanyń tamǵan jerińe, ósken aýylyńa, qalań men óńirińe, ıaǵnı týǵan jerińe degen súıispenshilikten bastalady» degen bolatyn. Sondyqtan bul forým «Týǵan jerge taǵzym» dep ataldy.
«Rýhanı jańǵyrý» baǵdarlamasy aıasynda uıymdastyrylǵan alqaly jıynǵa oblys ákimi Eraly Toǵjanov bastaǵan memlekettik mekeme basshylary men óz óńiriniń órkendeýine úles qosyp júrgen metsenattar qatysty.
Іs-shara barysynda aýdan ákimderi men orynbasarlary forým qonaqtaryn áleýmettik jobalar usynylǵan kórmemen tanystyrdy. Mańǵystaý oblysynda «Týǵan jer» jobasyn iske asyrý men ilgeriletý protsesine kásipkerler qaýymy belsendi atsalysýda. Metsenattardyń qarjylaı qoldaýymen aýyldar abattandyrylyp, áleýmettik nysandar salynyp jatyr. Tarıhı eskertkishter men mádenı oryndardy qalpyna keltirýge baǵyttalǵan jobalar da bar.
Oblystaǵy 100 metsenattyń demeýshiligimen, bıyl jalpy somasy 43 mlrd 699 mln teńge bolatyn 110 joba júzege asyrylǵan.
Olardyń 16-sy salaýatty ómir saltyn qalyptastyrý men óńirlik sportty damytýǵa baǵyttalǵan. «Qorshaǵan ortany qorǵaý» baǵyty boıynsha 4 joba iske asyp, «Jaqynyńa járdemdes» jobasy boıynsha 8 qaıyrymdylyq shara ótken. «Bilim qazyna» baǵytynda 18 is-shara uıymdastyryldy. Al, mádenıet pen ónerdi damytýǵa arnalǵan 4 joba júzege asyryldy. Densaýlyq saqtaý salasynda da keleli jumystar qolǵa alyndy. 2017 jyldyń ózinde atalmysh baǵyt boıynsha 22 joba demeýshilerdiń qarjysymen iske asty. Budan basqa baǵyttar boıynsha 38 is-shara ótken.
Forým barysynda «Týǵan jer» baǵdarlamasy aıasynda halyqtyń jaǵdaıyn jaqsartyp, qoǵamdyq sanasyn jańǵyrtý maqsatynda, oblystyń damýyna yqpal etetin áleýmettik jobalardy usyný múmkindigi berilgen aýktsıon ótti. Aýktsıonǵa 7 joba usynyldy. Atap aıtsaq, Munaıly aýdanynda sportzal keshenin salý. Jobanyń jalpy quny: 516 292 000 tg.Investıtsııa kólemi 250 mln teńge qarajat bolatyn Túpqaraǵan aýdanyndaǵy sport kesheni jáne Aqtaý qalasynda Abaı Qunanbaev pen Nurmuhan Jantórınge arnalǵan eskertkish ornatý. Joba quny 80 mln teńge bolady. Ár joba satylǵannan keıin jeńimpazdar jarııalanyp, olarǵa nysannyń qujaty tabys etildi.
Sondaı-aq, forýmda oblys ákimi Eraly Toǵjanov jańa jobanyń tusaýyn kesti. «Rýhanı jańǵyrý» baǵdarlamalyq maqalasy aıasynda aımaqtyń klımattyq ereksheligine baılanysty, oblystaǵy barlyq bilim berý uıymdarynda «Jasyl mektebim - jasyl mekenim» jobasyn iske qosýdamyz»,- dedi aımaq basshysy. Baǵdarlamanyń maqsaty - ekologııalyq máseleni sheshý úshin aınalany kógaldandyrý; balalardyń sanasyn eńbekke baýlý arqyly tárbıeleý; oqýshylarǵa arnalǵan ǵylymı-tájirıbelik ortalyq ashý; tamshylatyp sýarý, paıdalanǵan sýdy qaıta óńdeý arqyly jańa tehnologııalardy damytý; mektepterde óz ónimin qoldaný arqyly kásipkerlikti damytýdy; bıýdjetten tys ınvestıtsııalardy tartý máselelerin sheshý bolyp tabylady. Jıynda atalǵan jobanyń tıimdiligin eskergen Mańǵystaýlyq birneshe metsenat mektep janynan óz qarajattaryna jylyjaı salýdy qolǵa aldy. Olar «Túlep ushqan bilim uıasyn kógaldandyrý arqyly týǵan jerge, óńirdiń damýyna osylaı úles qosqanymyzǵa qýanyshtymyz!»,- dep tilekterin bildirdi. Forým eki bólimnen turady. Alǵashqysynda jańa jobalardyń kórmesi usynylyp, aýktsıon uıymdastyryldy. Al ekinshi jartysynda oblys ákimi Eraly Toǵjanov metsenattardy marapattap, halyqtyń atynan alǵys bildirdi.