Mańǵystaýlyq kedenshiler Túrkııadan jetkizilgen iri kontrabandalyq júktiń jolyn kesti
Baspasóz qyzmetiniń málimetterine qaraǵanda, «Quryq» keden beketiniń qyzmetkerleri Mańǵystaý kólik prokýratýrasymen birlesip, Eýrazııalyq ekonomıkalyq odaq shekarasy arqyly iri kólemde kontrabandalyq taýar alyp ótý faktisin anyqtady.
Kontrabandalyq júk tıelgen eki aýyr júk kóligi Túrkııadan «Quryq» teńiz portyna keldi. Taýarǵa ilespe qujattarǵa sáıkes, taýardy túrik óndirýshileri Ózbekstan men Qyrǵyzstan azamattarynyń atyna jibergen.
Selektıvti baqylaý jáne táýekelderdi basqarý júıesiniń kómegimen, sondaı-aq iri gabarıtti júkter men kólik quraldarynyń ishindegisiniń beınesin alý jáne taldaý úshin ıondalǵan sáýle shashatyn tehnıkalyq quraldyń kómegimen alynǵan tekseris nátıjesinen keıin, tasymaldanyp bara jatqan júkti qosymsha kedendik tekserý jóninde sheshim qabyldanǵan. Onyń barysynda qujatta kórsetilgen taýardan bólek, halyq tutynatyn ózge de taýarlar bary belgili boldy.
Durys deklaratsııalanbaǵan taýarlar men deklaratsııalanbaǵan taýarlardyń jalpy kedendik quny - 187,2 mln. teńgeni qurasa, bıýdjetke tólenýge tıisti kedendik tólemder men salyqtar – 80,7 mln. teńge boldy.
Kemitip kórsetken taýarlardy qosqanda jalpy jarııalanǵan taýar salmaǵy – 34,5 tonnany qurasa, jarııalanǵanbaǵan taýar salmaǵy - 5,9 tonnadan asady. Kemitip kórsetken taýarlardyń ishinde aıaq kıim, áıelder oramaldary, jeıdeler men basqa da kıimder bar. Odan bólek, jarııalanǵanbaǵan taýardyń ishinde kúrteler, kóılekter, kıim jıyntyqtary jáne t.b. bar ekeni anyqtaldy.
«Kontrabandalyq jolmen jetkizilmek bolǵan taýardyń sany júzden astam júk ornyn quraǵan. Materıaldar Mańǵystaý oblysy boıynsha Ekonomıkalyq tergeý departamentine protsessýaldyq sheshim qabyldaý úshin joldandy»,-delingen Qarjy mınıstrliginiń Memlekettik kirister komıtetiniń baspasóz qyzmeti taratqan málimetterde.