Mańǵystaýlyq kásipkerler halyqaralyq irimshik jasaýshylar gıldııasyna qabyldandy

Mańǵystaýlyq Aleksandra Grıgolova men Nıkıta Kobzev Frantsııadaǵy «Mondial du fromage-2023» halyqaralyq irimshik jáne sút ónimderi baıqaýynda kúmis pen qola júldege ıe boldy, dep habarlaıdy QazAqparat tilshisi.

«Mondial du fromage 2023» baıqaýy - irimshik jasaý álemindegi mańyzdy oqıǵa. Baıqaýda álemniń ár túkpirinde ázirlengen irimshiktiń 1 600 túri tanystyryldy. Atalǵan ónimderdiń arasynan 250 tóreshi irimshiktiń 150 túrin joǵary baǵalady. Olardyń qatarynda Aleksandra men Nıkıtanyń «Jeti laq» fermasynda jasalatyn eshki men túıe sútinen daıyndalǵan irimshiktiń 2 túri bar.

«Qazaqstan tarıhynda tuńǵysh ret bizdiń óndirýshiler úzdik álemdik irimshik jasaýshylarmen konkýrsqa qatysyp, otandyq ónimderdi usyndy. Bizdiń maqsatymyz - irimshik mádenıeti men irimshik jasaý sheberligin damytý. Baıqaýǵa 6 aıdan astam ýaqyt daıyndaldyq. Osyndaı jetistikke jetkenimizge óte qýanyshtymyz jáne maqtan tutamyz. Bizdi halyqaralyq irimshik jasaýshylar gıldııasyna saltanatty túrde qabyldady. Bul - irimshik áleminiń elıtasy. Biz Qazaqstannyń osy ataqqa ıe bolǵan alǵashqy irimshik jasaýshylarymyz», - deıdi Aleksandra Grıgolova.

Aıta keteıik, olardyń fermasy Túpqaraǵan aýdanyndaǵy Aqshuqyr aýylynda 2020 jyldan bastap jumys isteıdi. Kásipkerler aıyna 3,5 tonna pasterlengen eshki sútin, ıogýrt, aıran, súzbe, qaımaq jáne irimshiktiń 12 túrin shyǵarady. Ferma 10 ga jerdi alyp jatyr, onyń tórt gektary eshki ósirýge arnalsa, qalǵan aımaqta jem-shóp qoımasy men sút óńdeý tsehy ornalasqan.