Mańǵystaýlyq ata-ana 11-synyp oqýshylaryn UBT-dan basqa synaqtardan bosatýdy usyndy

AQTAÝ. QazAqparat - Mańǵystaý oblysy ákimdiginiń Telegram kanalynda 11-synyp oqýshylarynyń test tapsyrý máselesi talqylandy, dep habarlaıdy QazAqparat.

Óńir turǵyny 11-synyptaǵy oqýshylarǵa bólimdi jıyntyq baǵalaý jáne toqsandy jıyntyq baǵalaý testiniń qıyn tıetinin aıtyp shaǵymdanǵan.

Óıtkeni bul qosymsha testilerdi tapsyrý ulttyq birińǵaı testke daıyndalyp júrgen oqýshylardyń zeıinin bóledi.

Sebebi bul baqylaý jumysyn oqýshylar barlyq mektep páni boıynsha tapsyrady. Al bul óz kezeginde UBT-daǵy tańdaý pánderine daıyndalatyn ýaqytty alady eken.

Onyń shaǵymyna oblystyq bilim basqarmasynyń ókili jaýap berdi.

- Bólimdi jıyntyq baǵalaý jáne toqsandy jıyntyq baǵalaý júrmese, oqýshyǵa toqsandyq baǵa shyqpaıdy. Toqsandyq baǵa shyqpaıtyn bolsa, 11-synyp oqýshysy attestat almaıdy. Attestat almaǵan bala UBT-ǵa da bara almaıdy. Sondyqtan, UBT-ǵa daıyndyqty sabaqtan tys ýaqytta jáne senbi, jeksenbi kúnderi 1-2 saǵat ýaqyt bólýdi usynamyz, - dedi bilim basqarmasynyń ókili Klara Qulataeva.

Qoǵamdyq kommýnıkatsııa ortalyǵynyń málimetinshe, qazirgi tańda oblys ákimdiginiń Telegram kanalyna 12 082 adam tirkelgen. Osy ýaqytqa deıin qoldanýshylardan 13 860 suraq kelip tússe, onyń 13 834-i sheshimin tapty.