Mańǵystaýlyq áskerıler aldandyq dep aryzdandy

AQTAÝ. QazAqparat – Mańǵystaý oblysynda «Batyl toıtarys-2022» oqý-jattyǵýlaryna qatysqan áskerıler áskerı komıssarıat tarapynan aldanyp qaldyq degen málimdeme jasady, dep habarlaıdy QazAqparat tilshisi.

Aıtýlarynsha, olarǵa oqý-jattyǵýlarǵa qatysqan 5 kún úshin 50-80 myń teńgeden tólenedi dep ýáde berilgen. Oqý-jattyǵýlar 12 kúnge sozylady, biraq qatysýshylarǵa eńbekaqy tolyq kólemde tólenbegen.

«Oqý-jattyǵýlarǵa qatysý úshin bizdi 5 kúnge jiberdi. Tolyǵymen alǵanda, men onda 12 kún boldym. Meniń ata-anama habarlasyp, osynda qalýdan bas tartyp otyrǵan jalǵyz adam dep aıtqan. Sottap, 3 mln teńge aıyppul salamyz dep qorqytypty»

, - deıdi Bekjan Kolıaı.

Aldanyp qaldyq dep jınalǵan ondaǵan adammen Mańǵystaý oblysy jumyldyrý daıarlyǵy jáne azamattyq qorǵaý basqarmasynyń basshysy Ǵalym Andalıev kezdesti. Aıtýynsha, bul jigitterge aqparat durys berilmegen.

«Oqý-jattyǵýlar 3 kezeńde ótkizildi. 11-22 sáýir – aýmaqtyq áskerlerdi uıymdastyratyn turaqty kezeń boldy. Oǵan 100 áskerı mindetti shaqyryldy. Olarǵa eńbekaqy jumys isteıtini nemese istemeıtindigine qaramastan tólenedi. Máselen, eger ol jumyssyz bolsa, onda oqý-jattyǵýǵa qatysqany úshin aıyna 60 myń alady. Eger ol jumys isteıtin bolsa jáne onyń eńbekaqysy Mańǵystaýdaǵy ortasha jalaqy kóleminen aspasa (ıaǵnı, 378 myń teńgeden tómen bolsa), onda óziniń aı saıynǵy eńbekaqysy kóleminde aqsha alady»

, - dedi ol.

Mańǵystaýdaǵy oqý-jattyǵýlar Aqtaýdan 15 km jerdegi kazarmalardyń birinde boldy. Ǵalym Andalıevtiń aıtýynsha, jigitter onda áskerı daıyndyqtan ótken. Basqarma basshysy qatysýshylardyń aqysy mamyr aıynda tólenetinin aıtty. Al, narazylyq bildirýshilerdiń máselesi boıynsha qosymsha jınalys uıymdastyryp, barlyq aqparatty tıisti organdarǵa joldaıtynyn málim etti.

Ókinishke qaraı, búgin Jambyl oblysynda áskerı boryshyn ótep jatqan sarbazdyń kóz jumǵanyn habarlaǵanbyz.