Mańǵystaýǵa Reseıden 100 túrli dári-dármek keledi
Bul týraly qoǵamdyq kommýnıkatsııa ortalyǵynda ótken brıfıngte Mańǵystaý oblysy boıynsha taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Rınat Kýbataev málimdedi.
Mańǵystaý oblysynyń ákimdigi kóterme saýda fırmalarynyń ókilderimen, «Provızorlar men farmatsevter qaýymdastyǵy» QB, kásipkerlermen májilis ótkizip, onda óńirlik kásipkerler tarapynan «FAIZ-2016» JShS jáne «Pharma plıýs» JShS-ne demeýshilik kómek kórsetý jáne dári-dármek satyp alý barysynda qarjy bólý týraly sheshim qabyldady.
Atalǵan seriktestiktiń Reseı Federatsııasynan dári-dármek jetkizý boıynsha kelisimsharty bar. Mańǵystaý oblysynyń ákimdigi osy máseleni sheshý úshin hat daıyndady.
Tótenshe jaǵdaıdyń aldyn alý maqsatynda, sonymen qatar halyqty dárimen qamtý úshin dári-dármekti bir márte kirgizý rásimdeledi.
Óńirge mynadaı preparattar ákelinedi:
- Azıtromıtsın, levofloksatsın, tsefazolın, tseftrıakson antıbıotıkteri;
- ıngavırın, rımantadın, anaferon, tamıflıý, arbıdol vırýsqa qarsy dárileri;
- AVQD: naız,ıbýprofen, novıgan, nımesılýd, ıbýfen, paratsetamol, aspırın, analgın, tsıtramon, teraflıý, taılol, fervek, maksıgrıpın;
- kleksan, fraksıparın, ksarelto - az mólsherdegi antıkoagýlıanttar;
- deksametazon - VQD az mólsherdegi steroıd.
Kóterme saýdamen aınalysatyn fırmalarǵa túsken dári-dármek ár turǵynǵa jetýi úshin oblystyń aýdan-qalalaryndaǵy dárihanalarǵa teń mólsherde bólinýde. Búgingi tańda dári-dármekpen qamtý isi túzelip keledi.
KVI boıynsha ahýaldyń órshýine jáne karantın sharalarynyń engizilýine baılanysty departament qyzmetkerleri lıtsenzııalyq baqylaý boıynsha tekseristi onlaın júrgizýde. BAQ jáne áleýmettik jeliler arqyly osy saladaǵy qyzmet boıynsha túsindirý jumystary júrgizilip jatyr. .
Sonymen birge departament kún saıyn barlyq farmatsevtıkalyq qyzmet obektileri men sýbektilerine telefon arqyly habarlasyp, qaladaǵy dárihanalar men qoımalarda dári-dármektiń bar-joǵyn anyqtap otyrady.