Mańǵystaýǵa bıyl 250 myńǵa jýyq týrıst kelgen
Óńirlik týrızm basqarmasynyń basshysy Máýlen Ǵabdýlqalıevtiń sózinshe, resmı statıstıkaǵa sáıkes týrıster sany 250 myńǵa jýyqtasa, tirkelmegenderdi qosa eseptegende shamamen 500 myń bolady.
Mańǵystaýǵa saıahattap kelgender kóbine Qaraman ata jerasty meshitine aıaldaıdy. Kıeli orynǵa keletin zııaratshylar sany ótken jylmen salystyrǵanda eki ese ósken.
«Qaraman ata óz zamanynda qasıeti biraz elge taralǵan, bedeldi, aq pen qarany aıyratyn ádil, kıesi bar adam bolǵan. Jerasty meshitinde adam emdep, shákirtterin tárbıelegen degen ańyz da bar. Sol sebepti, bul qasıetti mekenge aýrýyna shıpa izdep, perzent tilep kelip jatady. Jyl saıyn jerasty meshitine arnaıy bas suǵyp, sadaqa berip, quran baǵyshtap, shıpa izdep kelýshiler sany artyp keledi. Bul - qýantarlyq jaıt», - dedi Mańǵystaý aýdanynyń turǵyny, Qaraman ata jerasty meshitine zııarattap kelýshi Ázirbaı Bekeev.
Sondaı-aq, týrısterdiń basym kópshiligi qazaq halqynyń turmys-tirshiligi men mádenıetin, salt-dástúrin dáripteıtin mekenniń biri - «Kógez» etnoaýylyna da turaqtaıdy. Etnoaýyl dırektory Evgenııa Slıýsarevanyń aıtýynsha, qaz-qatar kıiz úıler tigilip, ulttyq naqyshta bezendirilgen demalys ornyna sheteldik týrısterdiń kelýi jıileı tústi. Olardyń arasynda, Koreıa, Italııa jáne Reseı elderiniń azamattary bar.
«Kógez» etnografıkalyq qazaq aýylynda týrıster men jolaýshy qonaqtar úshin 15 kıiz úı tigilgen. Úsh birdeı kategorııa boıynsha qonaqtarǵa qyzmet usynylady. Kıiz úıdiń biri tamaq ishýge, ózge biri jatyn oryn, al úshinshisi sýretke túsýge arnalǵan. Etnoaýylǵa kúnine 5-10 jolaýshy keledi. Olardyń qyzyǵýshylyǵy erekshe», - dedi Evgenııa Slıýsareva.