Mańǵystaýdyń shekara zastavalaryna jasyl tehnologııalar engiziledi

AKTAÝ. QazAqparat - Mańǵystaý oblysynyń ákimi Eraly Toǵjanov Aqtaý shekara jasaǵynyń memlekettik shekara bólimshelerine bardy jáne jasyl tehnologııany qoldaný arqyly shekara zastavalaryn elektrlendirý máselesi boıynsha jumys isteýdi tapsyrdy, dep habarlaıdy «QazAqparat» HAA tilshisi.

Osylaısha, aımaq ákimi «Sýe» tehnıkalyq qadaǵalaý beketiniń, «Dalıa» shekara zastavasynyń, «Temir baba» shekaralyq baqylaý beketi avtokólik bólimshesi qyzmetimen jáne áskerı qyzmetshilerdiń ómir súrý jaǵdaıymen tanysty. Sondaı-aq, Eraly Toǵjanov «Bolashaq» jáne «Ústirt» shekaralyq zastavalaryn kúzetetin 2018 áskerı bóliminiń áskerılerimen kezdesti.
 

Jumys sapary barysynda óńir basshysy Qaraqııa aýdanynyń ákimdigine, 
energetıka jáne turǵyn úı-kommýnaldyq sharýashylyq basqarmasyna jasyl tehnologııany paıdalaný arqyly zastavalar men beketterdi elektrlendirý máselesin zertteýdi tapsyrdy.

«Sýe» tehnıkalyq qadaǵalaý beketi men «Ústirt» shekara zastavasyn jasyl tehnologııany paıdalaný arqyly elektrlendirý, elektr qýatynyń tapshylyǵyn joıý jáne «Temir baba» shekara baqylaý beketiniń barlyq nysandaryn elektr toǵymen úzdiksiz qamtý asa mańyzdy», - dedi Eraly Toǵjanov.

Tıisti memlekettik organdarǵa «Sýe» beketine sý tushytý qondyrǵysyn ornatý jáne Qaraqııa aýdanynyń Bolashaq aýylyna deıin qıyrshyq jol salý múmkindigin qarastyrý tapsyrmasy berildi.