Mańǵystaýdan Ózbekstanǵa qatynaıtyn jol qaıta jóndelmek
«Beıneý-Aqjigit-Ózbekstan Respýblıkasynyń shekarasy» avtomobıl joly asa mańyzdy kólik ınfraqurylymdyq nysany bolyp tabylady. Ol Quryq portynan basqa elderge júk tasymaldaýǵa múmkindik beredi. Joldyń ekinshi kategorııasy 85 shaqyrymdy quraıdy. Ol Ózbekstan shekarasynan bastalyp Beıneý aýdanynan ótedi.
«Ótken jyldyń sońynan bastap elimizdiń Ózbekstan Respýblıkasymen qarym-qatynasy nyǵaıa tústi. Ústimizdegi jyldyń birinshi toqsanynda eki el arasyndaǵy saýda aınalymy 37 %-ǵa ósti. Respýblıkanyń Ózbekstanmen baılanys joly tek Ońtústik Qazaqstan oblysynyń Saryaǵash aýdany men Beıneý aýdanynda ǵana bar. Beıneý aýdany Ózbekstanmen temirjol men avtomobıl joly arqyly qatynas jasaıtyn elimizdiń kıeli qaqpasy ǵana emes, Orta Azııanyń Reseıge, odan ári Eýropaǵa shyǵatyn birden-bir qatynas joly. Mańǵystaý oblysy iri kóliktik logıstıkalyq ortalyqqa aınalyp keledi», - dedi oblys ákimi Eraly Toǵjanov.
Joldyń qurylys jumystary 2018 jyly aıaqtalady dep kútilýde. Jobanyń quny 19,8 mlrd teńge. Merdiger «Temirjol Jóndeý» JShS-gi. Joba respýblıkalyq bıýdjetten qarjylandyrylady. Eraly Toǵjanov avtomobıl jolynyń rekonstrýktsııa jasaý jumystary qarqyndy júrgiziledi, óıtkeni bul Kaspıı kólik dálizinde júk tasymaldaýdy qamtamasyz etetin mańyzdy nysan ekenin atap ótti.