Mańǵystaýdan Arysqa 8 tonna kıim jiberildi

AQTAÝ. QazAqparat - Arys jurtshylyǵyna qoldaý kórsetý maqsatynda arnaıy gýmanıtarlyq kómek jınaý pýnktileri ashylyp, 8 tonna kıim jiberildi, dep habarlaıdy QazAqparat tilshisi.

«Nur Otan» partııasynyń oblystyq, aýdandyq fılıaldarynda, sonymen qatar «Jastar» resýrstyq ortalyqtarynda, Qazaqstan halqy Assambleıasy janyndaǵy «Qoǵamdyq kelisim» jáne «Biz adambyz-Biz birgemiz» qaıyrymdylyq qory bazasynda arnaıy gýmanıtarlyq kómek jınaý pýnktileri ashyldy. 8 tonna kıim, 6 tonna azyq-túlik jınalyp, alǵashqy gýmanıtarlyq júk 27 maýsym kúni temir jol arqyly jóneltildi. Onyń ishinde azyq-túlik, kıim-keshek, dári-dármek, jeke gıgıena quraldary jáne birinshi kezekte qajetti zattar qamtylǵan. Bul sharalar áli de jalǵasyn tabýda.

Aıta keteıik, oblystyń memlekettik qyzmetshileri, dárigerleri men muǵalimderi, munaıshylar men iri kásiporyndary jarylys saldarynan zardap shekken turǵyndarǵa kómek retinde bir kúndik jalaqysyn aýdardy.