Mańǵystaýdan 700-ge jýyq azamat áskerge attanady

AQTAÝ. QazAqparat - Bıyl óńirden 700-ge jýyq azamat áskerge attanady. Bul týraly oblystyq Qorǵanys isteri jónindegi departamentiniń ókilderi málimdedi, dep habarlaıdy Qazaqparat tilshisi.

Shaqyrylǵandardyń alǵashqy legi Atyraýǵa jóneltildi. Olar №2016 áskerı bóliminde boryshyn óteıdi. Elimiz boıynsha kúzgi áskerge shaqyrý naýqany qyrkúıek aıynda bastaldy. Bıyl 1993-2000 jyly týǵan azamattar áskerge barady. Azamattar QR Ulttyq qaýipsizdik komıtetiniń shekara qyzmetine, QR Memlekettik kúzet qyzmetine, sosyn QR Qarýly kúshterine jáne QR Ulttyq Ulanyna jiberiledi. Merzimdi áskerı qyzmetke shaqyrý jeltoqsan aıynyń sońyna deıin júrgiziledi.

«Áskerı shaqyrylý kezinde irikteý kezeńi bolady. Olardyń bilimderi, alǵan mamandyqtary boıynsha áskerge jóneltiledi. Oǵan deıin 40 shaqty azamatty Aqtaý, Almaty áskerı bólimderine jiberdik. Endi 600-den astam jigit jóneltiledi», - dedi Mańǵystaý oblystyq Qorǵanys isi jónindegi departamenti bastyǵynyń orynbasary Shynbolat AQMURATOV.