Mańǵystaýdaǵy «Qoshqar ata» kólin tazartýdy Májilis depýtattary nazarǵa aldy

NUR-SULTAN. QazAqparat - Májilis depýtattary Edil Jańbyrshın men Samat Mýsabaev aımaqtarǵa sapar barysynda Mańǵystaý oblysyna bardy, dep habarlaıdy QazAqparat tómengi palatanyń baspasóz qyzmetine silteme jasap.

Depýtattar ekologııalyq keńes múshelerimen birge Munaıly aýdanyndaǵy «Qoshqar ata» oıpatynda radıoaktıvti qaldyqtar qoımasyn zalalsyzdandyrýǵa qatysty máselelerdi talqylady.

Munaıly aýdany aýmaǵyndaǵy «Qoshqar Ata» kóli Kaspıı teńizine 7-8 shaqyrym jerde ornalasqan. Al, Aqtaý qalasynan 3-4 shaqyrym qashyqtyqta jatyr. Bul kól qaldyqtar qoımasynyń jalpy aýdany 77 sharshy shaqyrym bolsa, qaldyqtardyń aýdany 66 sharshy shaqyrym shamasynda.

Turǵyndardyń aıtýynsha, Mańǵystaý oblysynyń búgingi ekologııalyq ahýaly ábden ýshyqqan. Oǵan «Qoshqar ata» ýly kóli de áser etip otyr. Onsyz da qýańshylyqtan jıi zardap shegip, sý tapshylyǵyn kóretin aımaq ýly kóldiń de zardabyn qosa tartýda. Qazir mańǵystaýlyqtar arasynda onkologııalyq, ókpe jáne júrek-qan tamyrlary aýrýlary, ıod tapshylyǵy sııaqty dert túrleri kóp. Densaýlyǵy jaramsyz ana men odan týatyn dimkás bala sany da az emes.

Bul ekologııalyq aımaqta 400 myńǵa jýyq adam turady. Turǵyndardyń densaýlyǵy úshin tazartý jumystaryn júrgizý asa mańyzdy. Búgingi tańda ýly kóldiń 266 gektary zalalsyzdandyrylǵan. Ýaqytynda rekýltıvıkatsııalaý jumystaryn aıaqtap, sekseýil egý josparda bar,-deıdi Májilis depýtaty Edil Jańbyrshın.

Depýtattar aımaqta jasalǵan jumystardyń sapasyna mán berip, aldaǵy atqarylar sharalar barysyn tyńdady. Merdiger mekeme basshysy istiń mán-jaıyn baıandady. Onyń aıtýynsha, ótken jyly bólingen 1 mlrd qarjy ıgerilip, 266 gektar jer zalalsyzdandyryldy. Bıyl bólingen 3 mlrd teńgege 800-900 gektar aımaqty rekýltıvatsııalaý josparlanýda. Jumysty júrgizýge 40-qa jýyq tehnıka, 70-ten astam adam tartylǵan.

Mańǵystaý oblysynan saılanǵan Májilis depýtattary óńirdegi máselege alańdaýly ekenin aıtyp, nazarlaryna alatyndaryn jetkizdi.