Mańǵystaýdaǵy gaz óńdeıtin zaýyttyń qural-jabdyqtarynyń 90 paıyzy tozǵan - Prezıdent
Qasym-Jomart Toqaevtyń aıtýynsha, sońǵy úsh jylda elimizde suıytylǵan munaı gazyn tutyný deńgeıi eki eseden astam ósken.
«Tek Mańǵystaý oblysynda avtokólikterdiń 90 paıyzdan astamynda suıytylǵan gaz paıdalanylady. Óńirdiń negizgi gaz jetkizýshisi - Qazaq gaz óńdeý zaýyty. Onyń negizgi qural-jabdyqtarynyń 90 paıyzy tozǵan. Zaýyttyń apattyq jaǵdaılarǵa baılanysty toqtap qalýy halyqty gazsyz qaldyrýy múmkin. Osy rette Qazaq gaz óńdeý zaýytynyń bazasynda salynatyn jańa gaz óńdeý zaýytynyń qurylysyn keshiktirý ekonomıkalyq turǵydan ǵana emes, sondaı-aq, áleýmettik jaǵynan da qaýip týǵyzady. Úkimetke «Samuryq-Qazyna» qorymen birlesip, atalǵan baǵyttaǵy jumysty jandandyrýdy tapsyramyn. Jańa zaýyt 2023 jyldan keshikpeı paıdalanýǵa berilýi tıis», – dedi Memleket basshysy.
Aıta keteıik, búgin Qasym-Jomart Toqaev gaz salasyn damytý jóninde keńes ótkizdi.