Mańǵystaýdaǵy «Beıneý-Aqjigit» avtojoly bıyl paıdalanýǵa beriledi

AQTAÝ. QazAqparat - Mańǵystaý oblysyndaǵy «Beıneý-Aqjigit» avtojoly 2019 jyly paıdalanýǵa beriledi, dep habarlaıdy QazAqparat QR Indýstrııa jáne ınfraqurylymdyq damý mınıstrliginiń baspasóz qyzmetine silteme jasap.

Baspasóz qyzmetiniń málimetinshe, uzyndyǵy 85 shaqyrym «Beıneý-Aqjigit» avtojolyn qaıta jańartý jobasy aıasynda tas joldy tehnıkalyq II sanattaǵy normatıvterge deıin jetkize otyryp, eki jolaqty jolǵa keńeıtý kózdelgen.

«2018 jyldyń qorytyndysy boıynsha bul ýchaskeniń 60 shaqyrymynda qozǵalys ashyldy. Qalǵan 25 shaqyrymda qurylysshylar 18 sý ótkizgish qubyrdy ornatý, jylytý pýnktin qaıta jańartý, sondaı-aq 2 demalys alańyn ornatý jumystaryn júrgizedi», delingen habarlamada.

Búginde jóndeý jumystaryna 80 tehnıka men 163 jumysshy jumyldyrylǵan. Jobanyń bas merdigeri - «TJJ-Avtodorstroı» JShS. Mamandardyń jospary boıynsha qaıta jańǵyrtýdan keıin «Beıneý-Aqjigit» avtojoldyń ótkizý qabileti 7 esege jýyq artyp, táýligine 7 myńǵa jýyq kólikti quraıdy.

Sondaı-aq, «Beıneý-Aqjigit» avtojoly «Quryq» porty arqyly kólik tranzıtin ulǵaıtýǵa yqpal etedi jáne Transkaspıı dáliziniń Ózbekstan jáne Ortalyq Azııanyń basqa da elderimen jańa qatynasyn qamtamasyz etedi.

Aıta keterligi, «Beıneý-Aqjigit» avtojoly boıyndaǵy jóndeý jumystaryn 2019 jyly aıaqtaý josparlanyp otyr.