Mańǵystaýdaǵy aýylda saýda ortalyǵy ashylyp, 500 adam jumyspen qamtylady

AQTAÝ. QazAqparat – Mańǵystaýdyń Túpqaraǵan aýdany Aqshuqyr aýylynda kóterme-bólshek saýda ortalyǵy ashylady dep josparlanǵan. Nátıjesinde 500 adam jumyspen qamtylmaq, dep habarlaıdy QazAqparat tilshisi.

Bul aýdandaǵy azyq-túlik, tutyný taýarlary baǵasynyń tómendeýine yqpal etedi. Ortalyqtyń qurylysy búginde qarqyndy júrip jatyr. 74 saýda núktesi men 300-ge jýyq saýda-sattyq konteınerleri ornalasatyn saýda úıiniń qurylysy byltyr bastalǵan bolatyn.

Bıyl ashylatyn ortalyqtyń tapsyrys berýshisi - «Optovyı tsentr Kokjar» JShS. Seriktestik dırektory Darııabaı Kalmenovtyń aıtýynsha, ortalyqyń arqasynda 500 adamdy jumyspen qamtý kózdelgen jáne onyń basym kópshiligi - jergilikti turǵyndar bolmaq. Kóterme-bólshek saýda ortalyǵynyń jalpy aýmaǵy - 2,8 ga.

Aýdan basshysy Aıdos Hamıev atalǵan nysannyń aýdan turǵyndaryna qajettiligi jaıly aıta kele óz usynysyn jetkizdi.

«Bıyl ashylatyn saýda ortalyǵy aýmaǵynda jumys jasaý úshin jergilikti turǵyndardy, aýyl adamdaryn alý qajet. Ortalyq azyq-túlik, taýar baǵasynyń tómendeýine yqpal etýi tıis. Kólik turaǵynda keptelis bolmas úshin qazirden bastap retteý kerek. Bazardyń aınalasy taza bolýyn da qamtamasyz etken jón»,-dedi ákim.