Mańǵystaýda júk kólikterine reıd júrgizilýde
QR Sybaılas jemqorlyqqa qarsy is-qımyl agenttiginiń Mańǵystaý oblysy boıynsha departamenti jáne kóliktik baqylaý ınspektsııasynyń uıymdastyrýymen ótken reıdte 2 kólikke aıyppul salyndy.
Júk kólikterin tekserýge kelgen mamandar aýyr kólikterge tıelgen júktiń salmaǵyn ólshep, belgili shekten aspaýyn qadaǵalaıdy. Jetibaı-Aqtaý baǵytynda toqtatylǵan Shacman F 2000 markaly mashına júrgizýshisiniń qujattary tolyq emes, taýarǵa ruqsat qaǵazy joq bolyp shyqty.
«Sonymen qatar, avtokóliktiń salmaǵy bekitilgen mólsherden asyp ketkeni anyqtaldy. Atap aıtqanda, kóliktiń salmaǵy ruqsat etilgen 25 tonnanyń ornyna 32 tonna shyqty. Sondaı-aq onyń qosarlanǵan bilekterinen de 5-10 tonna artyq salmaq shyqty»,- Mańǵystaý oblysy boıynsha kóliktik baqylaý ınspektsııasynyń bólim basshysy Talǵat Esengeldi.
Atalǵan faktiler boıynsha, QR Ákimshilik kodeksimen 2 hattama rásimdeldi. Aýyr salmaq boıynsha 571 babynyń 6-bóligimen, taýar qujatynyń bolmaýy boıynsha 71-babynyń 1-tarmaǵymen toltyrylyp, jaýapqa tartylmaq. Osylaısha, mashına aıypturaqqa jabyldy. Al, Aqtaý-Shetpe tas jolynda tekserilgen Howo markaly kólikte tıelgen júk salmaǵy 36 tonnadan asty. Budan bólek, júrgizýshi usynǵan ruqsat qaǵazy zańda belgilengen úlgige saı bolmaı shyqty.