Mańǵystaýda jol salasynda kásibı mamandar jetispeıdi

AQTAÝ. QazAqparat - Bul týraly Mańǵystaý oblystyq qoǵamdyq kommýnıkatsııa ortalyǵynda ótken brıfıngte «Jol aktıvteri ulttyq sapa ortalyǵy» RMK Mańǵystaý oblystyq fılıalynyń baspasóz hatshysy Talǵat Ádil habarlady.

Ýákiletti mekeme ókiliniń aıtýynsha, 2021 jyly ortalyq tarapynan barlyq oblystaǵy ákimdikterde jolaýshylar kóligi jáne avtomobıl joldary bóliminde jasaıtyn qyzmetkerlerge taldaý júrgizilgen.

- 1 600-ge jýyq adamnyń jergilikti atqarýshy organdarda jol salasyna qatysty bólimde jumys jasaıtyny belgili boldy. Biraq, onyń ishinde 190 adamnyń ǵana jol mamandyǵy boıynsha sáıkes dıplomy bar eken. Rasyn aıtýymyz kerek, Mańǵystaý oblysynda da jol qurylysynyń qyr-syryn biletin maman tapshy. Olqylyqty túzetý úshin bıyl sáýir aıynda Aqtaýda kásibı biliktilikti arttyrý semınaryn ótkizdik, - dedi Talǵat Ádil.

Spıkerdiń aıtýynsha, sáýir aıynda Aqtaýda kásibı biliktilikti arttyrý maqsatynda ótkizilgen semınarǵa aýdan-qala ákimdikteriniń qyzmetkerleri men avtojoldardy salýshy merdiger mekemelerdiń mamandary qatysqan.

Olar avtomobıl joldaryn jóndeý nemese qaıta tóseý boıynsha jańa tehnologııalardy qoldanýdy úırenip, jalpy osy saladaǵy sońǵy jańalyqtarmen tanysqan.

Semınarǵa qatysýshylardyń suraýy boıynsha bıyl osyndaı shara taǵy ótkiziletin bolyp sheshildi.

Aıta keteıik, mańǵystaýlyq joldardyń sapasyn baqylaýshylar Reseıge, sondaı-aq Nur-Sultan, Almaty jáne Shymkent qalasynda ótken biliktilik arttyrý semınarlaryna baryp júr.

Olar jınaǵan tájirıbesin búginde bólisip jatyr.