Mańǵystaýda jol boıynda qaraýsyz júrgen 220-ǵa jýyq mal qamaldy

AQTAÝ. QazAqparat – Mańǵystaý oblysyndaǵy respýblıkalyq mańyzy bar Aqtaý-Shetpe tas jolynyń boıynda júrgen 220-ǵa jýyq ıesiz mal janýarlarǵa arnalǵan orynǵa qamaldy, dep habarlaıdy QazAqparat tilshisi.

«Tórt túlik avtomobıl jolynyń júrý bóliginen ótken. Polıtsııa qyzmetkerleri olardy arnaıy janýarlarǵa arnalǵan orynǵa qamady», - dep málim etti Mańǵystaý oblystyq polıtsııa departamentinen.

Jol apattarynyń aldyn alý maqsatynda mundaı is-sharalar jıi ótkizilip turmaq.

Eske salsaq, 22 qyrkúıek kúni Aqtaý-Jańaózen tasjolynyń boıynda túıege soǵylǵan kóliktegi jolaýshy kóz jumdy. Al, 16 qyrkúıekte «Vaz 21154» avtokóliginiń júrgizýshisi Aqtaý qalasynan Shetpe aýylyna baratyn jolda eki túıeni qaqqan . Tas joldaǵy oqıǵadan eki jolaýshy kóz jumyp, bes adam aýrýhanaǵa jetkizilgen edi.

Jalpy, oblysta keıingi 10 kúnde janýarlarǵa kóliktiń soǵylýymen 3 iri jol-kólik oqıǵasy bolyp, 6 adam qaza tapty.