Mańǵystaýda zańsyz qaldyq tókken kompanııa 39 mln-nan astam teńge tóledi

AQTAÝ. QazAqparat – Mańǵystaý oblysynda qorshaǵan ortaǵa zalal keltirgen kompanııadan 39 mln teńgeden astam qarjy óndirildi, dep habarlaıdy QazAqparat QR Ekologııa, geologııa jáne tabıǵı resýrstar mınıstrligine silteme jasap.

Mınıstrlikke qarasty Mańǵystaý oblysy boıynsha ekologııa departamenti «Kaspıı Tsement» JShS-yn profılaktıkalyq baqylaý kezinde qaldyqty zańsyz tókkenin anyqtady.

«JShS qondyrǵyny paıdalaný kezinde taýarlyq beton óndirý úshin memlekettik ekologııalyq saraptamanyń oń qorytyndysy men ruqsatynsyz qorshaǵan ortaǵa shyǵaryndylar tastaǵan. Uıym 5,5 myń tonna kóleminde pesh kúlin tastaǵan.
Kásiporynǵa buzýshylyqty joıý týraly uıǵarym shyǵaryldy jáne 39 mln teńgeden astam somaǵa zalal keltirilgeni anyqtaldy. Qazirgi ýaqytta, bul soma memleket kirisine óndirildi», delingen habarlamada.
Ekologııa departamenti nusqamany tolyq oryndaý úshin erekshe baqylaýǵa aldy.