Mańǵystaýda zańsyz aýlanǵan 118 keli bekire balyǵy tárkilendi
Mańǵystaý oblystyq polıtsııa departamentiniń baspasóz qyzmeti habarlaýynsha, Túpqaraǵan aýdanynyń eki turǵynyna qatysty qylmystyq is qozǵaldy. Jedel-izdestirý is-sharalary barysynda patrýldik polıtsııa qyzmetkerleri «Aqtaý-Aqshuqyr» avtojolynyń 19 shaqyrymynda «Chevrolet Lacetti» markaly avtokóligimen bekire tuqymdas balyq tasymaldaǵan 34 jastaǵy er adamdy ustady. Bekire balyǵynyń jalpy salmaǵy 67 keli.
Sol kúni tabıǵat qorǵaý polıtsııasynyń qyzmetkerleri zańsyz aýlanǵan bekire balyǵyn Túpqaraǵan aýdanynyń taǵy bir turǵynynan tárkiledi.
«Kúdiktiniń úıin tintý kezinde polıtsııa turǵynnyń saraıynan jalpy salmaǵy 51 keli bolatyn 15 dana bekire tuqymdas balyǵyn muzdatqyshty tapty», - dep habarlady oblystyq polıtsııa departamenti.
Eki derek boıynsha QR QK 339-babynyń 1-bóligi (sırek kezdesetin jáne Quryp ketý qaýpi tóngen, sondaı-aq paıdalanýǵa tyıym salynǵan ósimdikter men janýarlar túrlerin, olardyń bólikterin nemese derıvattaryn zańsyz paıdalaný) boıynsha sotqa deıingi tergeý bastaldy.