Mańǵystaýda vagon tekserýshi poıyz apatynyń aldyn aldy

ASTANA. QazAqparat - Mańǵyshlaq stantsııasynda vagon qaraýshy Berik Dúısembaev poıyzdy tehnıkalyq tekserý kezinde poıyz qozǵalysyna asa qaýipti vagon quramynyń joldan shyǵyp ketýine sebep bolatyn  aqaýdy anyqtady. Bul týraly QazAqparat «Qazaqstan temir joly» UK» AQ baspasóz qyzmetine silteme jasap habarlady.

Temirjolshylardyń habarlaýynsha, tirkemesiniń búıir jaqtaýshasynda jaryqshaq paıda bolǵan vagon jedel túrde, jyljymaly quramnan  ajyratylyp,  jóndeýge qoıyldy.

Mańǵystaý vagon paıdalaný deposynyń bastyǵy Sársenbaı Esenqulovtyń aıtýynsha, vagon qaraýshy B. Dúısembaev óziniń mindetin úlken jaýapkershilikpen atqarady.

S. Esenqulov B. Dúısembaevtyń vagon qaraýshy bolyp on jyldan beri qyzmet etip kele jatqandyǵyn aıtady. Bul onyń vagon aqaýyn taýyp anyqtap otyrǵany birinshi ret emes. Vagon qaraýshy buǵan deıin temirjol qaýipsizdigin saqtaý qorynyń syılyǵyna ıe bolǵan.