Mańǵystaýda úshem dúnıege keldi

AQTAÝ. QazAqparat - Aqtaýda taǵy da úshem dúnıege keldi. Sábıdiń ekeýi qyz, bireýi ul bala, dep habarlaıdy QazAqparat tilshisi.

Nárestelerdiń árqaısysynyń salmaǵy 2 keliden asady. Olar jyl basynan beri óńirde týǵan úshinshi úshem. Dárigerlerdiń aıtýynsha, sábılerdiń densaýlyǵy jaqsy.

Alına, Zarına, Álıhan. Otbasyn shattyqqa bólep, dúnıege kelgen úshemge ata-anasy osy esimderdi tańdaǵan. Saıyn Shapaǵatov aýylynyń turǵyny Meńlihan Saıtǵalıeva súıinshi jańalyqty júktiliktiń 1 jarym aıynda estigen. Ýltra dybystyq tekserýden keıin qýanyshynda shek bolmaǵan. Ol júktiliktiń 34-aptasynda sábılerin dúnıege ákelgen. Buǵan deıin 3 perzent tárbıelep otyrǵan 38 jastaǵy Meńlihan kópbalaly ana atandy.

«Bir Allanyń kómegimen úshem dúnıege keldi. Úıde eki ulym, bir qyzym bar. Men óte baqytty anamyn dep esepteımin. Mundaı úshemder ekiniń birinde bola bermeıtin dúnıe ǵoı», - deıdi Meńlihan Saıtǵalıeva.

Sábıler men jas bosanǵan ana eki juma dárigerlerdiń baqylaýynda bolyp, úılerine jiberildi. Mamandar merziminen erte bosanǵan ana men balalardyń ómirine esh qaýip joq ekenin aıtady. Aıta keteıik, «Ana men bala» ortalyǵynda 2018 jyly 1 úshem men 146 egiz týǵan. Al, jyl basynan beri 3 úshem men 116 egiz dúnıege kelgen.