Mańǵystaýda tabıǵat qorǵaý zańnamasyn buzǵandarǵa 1,2 mln teńge aıyppul salyndy

AQTAÝ. QazAqparat – Mańǵystaý oblysynda 20 qazanda bastalǵan «Brakoner» respýblıkalyq is-sharasy kezinde 130-dan asa quqyq buzýshylyq anyqtalǵan. Bul týraly oblystyq polıtsııa departamentinen málim etti, dep habarlaıdy QazAqparat tilshisi.

«Oblys kóleminde 3 qylmystyq is qozǵalyp, 127 tulǵa ákimshilik jaýapkershilikke tartyldy. QR Ákimshilik quqyq buzýshylyq týraly kodeksiniń 382-baby (Janýarlar dúnıesin paıdalaný talaptaryn jáne ań aýlaý erejelerin buzý) boıynsha 84 ákimshilik quqyq buzýshylyq anyqtaldy. Al, balyq aýlaý jáne balyq resýrstary men basqa da sý janýarlaryn qorǵaý qaǵıdalaryn buzý boıynsha 16 derek tirkeldi. Sonymen qatar, QR Qylmystyq kodeksiniń Sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan ósimdikter men janýarlardyń túrlerin, olardyń bólikterin nemese derıvattaryn zańsyz paıdalaný boıynsha – 2, balyq resýrstaryn, basqa da sý janýarlaryn nemese ósimdikterin zańsyz aýlaý boıynsha – 1 qylmys tirkeldi», - delingen baspasóz málimetinde.

Atalǵan derekter boıynsha zań buzýshylarǵa 1 225 200 teńge aıyppul salynǵan.

«Brakoner» jedel aldyn alý is-sharasy oblysta 19 qarashaǵa deıin jalǵasady.