Mańǵystaýda sý jáne jylý jelileriniń 53 paıyzy tozǵan

AQTAÝ. QazAqparat - «Tarıfti ınvestıtsııaǵa aıyrbastaý» baǵdarlamasy - ınjenerlik jelilerdiń tozýyn 15% azaıtý, shyǵyndy tómendetý jáne qyzmet sapasyn jaqsartýǵa múmkindik beredi. Bul týraly qoǵamdyq kommýnıkatsııa ortalyǵynda ótken brıfıngte Mańǵystaý oblystyq tabıǵı monopolııalardy retteý departamentiniń basshysy Jandos Salımov málim etti, dep habarlady QazAqparat tilshisi.

Spıkerdiń aıtýynsha, qazirgi tańda Mańǵystaý oblysynda elektr jelileriniń tozýy - 59,31%, jylý jáne sý qubyry jelileriniń tozýy - 53%.

Jańa baǵdarlama múlik ıeleri esebinen salaǵa ınvestıtsııalar tartýdy, tabıǵı monopolııalar salasyndaǵy qyzmetkerlerdiń jalaqysyn arttyrýdy, tabıǵı monopolııa salasyna ozyq ınnovatsııalardy engizýdi yntalandyrý jolymen odan ári retteýdi kózdeıdi.

«Eger tabıǵı monopolııa sýbektisi kásiporyndy damytý úshin jelilerdiń tozýyn azaıtý úshin ınvestıtsııa tartqan jaǵdaıda paıda normasy belgilenedi. Bul jaǵdaıda ol paıdanyń belgili bir úlesine quqyly bolady. Qazir ólshemder týraly aıtý qıyn, óıtkeni munda biz eskeretin birqatar faktorlar bar. Jalpy árbir sýbekt boıynsha jumys jeke júrgiziledi. Biz onyń qansha ınvestıtsııa tarta alatynyn, qyzmetin jaqsartý úshin qandaı kórsetkishterge qol jetkizetinin qarastyramyz. Mysaly apat sanyn qanshalyqty azaıtty, jumysty qalpyna keltirýge ketetin ýaqyt qysqardy ma degen sııaqty», - dedi Jandos Salımov.

Óńirde kóptegen kásiporyndar nesıelendirilgen. Sondyqtan ınvestıtsııa tartý qıynǵa soǵýy múmkin.

Qazir taldaý júrip jatyr. Eger usynys maquldansa, onda tabıǵı monopolııalardyń árbir sýbektisi úshin jeke qoldanylady.