Mańǵystaýda sý tazartý qondyrǵysyn salýǵa bólingen qarajat jymqyrylǵan

NUR-SULTAN. QazAqparat - Qarjylyq monıtorıng agenttiginiń Mańǵystaý oblysy boıynsha aýmaqtyq departamenti asa iri mólsherde bıýdjet qarajatyn jymqyrý deregi boıynsha sotqa deıingi tergep-tekserý jumystaryn bastady.

Bul týraly QazAqparat QR Qarjy mınıstrligi Qarjylyq monıtorıng agenttiginiń baspasóz qyzmetine silteme jasap habarlaıdy.

Jedel-tergeý is-sharalary barysynda 2017 jyly «Beıneý aýdandyq qurylys bólimi» memlekettik mekemesi jáne merdiger uıym arasynda Mańǵystaý oblysy, Beıneý aýdany, Sarǵa aýylynda 477,6 mıllıon teńge somasyna sý tazartqysh qondyrǵysy men aýylaralyq sý qubyry qurylysyna memlekettik satyp alý sharty jasalǵany anyqtaldy.

Sot-qurylys saraptamasynyń qorytyndysyna sáıkes atqarylmaǵan jumystardyń somasy 203,6 mıllıon teńgeni quraıdy.

Memlekettik mekemelerdiń qurylymdyq bólimsheleriniń jáne qurylys salasyndaǵy merdigerlik uıymdardyń basshylary tulǵasyndaǵy kúdiktiler ustalyp, ýaqytsha ustaý ızolıatoryna qamaǵa alyndy.

«Tergeý jalǵasýda. Tergeý múddesine oraı ózge aqparat jarııa etýge jatpaıdy» QRR QMA baspasóz qyzmeti taratqan habarlamada.