Mańǵystaýda pandemııa kezinde toqtap qalǵan 17 myńǵa jýyq kásipker salyq tóleýden bosatyldy

NUR-SULTAN. QazAqparat - Mańǵystaýlyq kásipkerler 2-toqsanda 17,6% ósim kórsetip, 692,6 mlrd teńgeniń ónimin shyǵardy. Búginde shaǵyn jáne orta bıznestiń 756 jobasy memlekettik qoldaý mehanızmin paıdalandy, dep habarlaıdy QazAqparat tilshisi.

Bul týraly oblys ákimi Serikbaı Trumov jýrnalısterge arnalǵan onlaın brıfıngide aıtty. Onyń aıtýynsha, Prezıdenttiń qoıǵan mindetteriniń biri – kásipkerlikti damytý arqyly jumys oryndaryn ashý.

«Onyń ishinde «Bıznestiń jol kartasy» baǵdarlamasy aıasynda 312 jobaǵa 51,8 mlrd teńgege qoldaý kórsetildi. 1 300-den astam jańa jumys orny qurylyp, 3 070 jumys orny saqtaldy. Byltyrmen salystyrǵanda qoldaý alǵan jobalar sany 1,7 esege artty. «Eńbek» memlekettik baǵdarlamasy boıynsha 1,6 mlrd teńgege 317 shaǵyn nesıe berilip, 399 jumys orny quryldy. Qarapaıym zattar ekonomıkasy aıasynda jeńildetilgen nesıe alýǵa quny 71,5 mlrd. teńgeniń 101 jobasy maquldandy», - dedi oblys ákimi Serikbaı Trumov.

Álemdik indettiń órshýine baılanysty kásibi turalap qalǵan óńirdiń 17 myńǵa jýyq shaǵyn jáne mıkrobıznes sýbektileri salyq tóleýden bosatylyp, jeńildik berilgen. Sondaı-aq, 404 kásipkerge jalpy somasy 14,8 mlrd teńgege negizgi qaryzdary men syıaqy tólemin óteý keıinge qaldyryldy. Budan bólek, bar-joǵy 1 paıyzben nesıe beretin óńirlik «Nur kapıtal» jobasy birneshe jyldan beri jemisin berip keledi. Bıyl 548,7 mln teńgeni quraıtyn 26 joba qarjylandyrylyp, 128 jańa jumys orny quryldy. Baǵdarlama bastalǵannan beri 2,9 mlrd teńgege 149 joba maquldanyp, 1 126 jańa jumys orny ashyldy.