Mańǵystaýda Ózen ken ornyn ońaltý máseleleri talqylandy

Mańǵystaý oblysynda Ózen ken ornyn ońaltý máselelerine arnalǵan jıyn ótti. Sharaǵa «QazMunaıGaz» UK AQ Basqarma tóraǵasy Maǵzum Myrzaǵalıev, «Ózenmunaıgaz» AQ bas dırektory Maqsat Ibaǵarov, «QMG Injınırıng» JShS bas dırektory Baqytjan Hasanov, munaı-gaz salasynyń ardagerleri, geologtar, qoǵam qaıratkerleri jáne Jańaózen qalasynyń depýtattary qatysty.

Aıta ketsek, QR Prezıdenti Qasym-Jomart Toqaev 2021 jyldyń qyrkúıeginde ótken Mańǵystaý oblysynyń áleýmettik-ekonomıkalyq damýy jónindegi keńeste «QazMunaıGaz» ulttyq kompanııasyna munaı ken oryndarynyń birte-birte tozýyna, 2030 jylǵa qaraı óndiriletin munaıdyń azaıýyna baılanysty óńirde geologııalyq-barlaý jumystarynyń jeke josparyn ázirleýdi tapsyrdy. Memleket basshysynyń tapsyrmasyna sáıkes, Ózen jáne Qaramandybas ken oryndaryn ońaltý josparynyń tujyrymdamasy ázirlendi. Ken oryndaryn ońaltý sharalary munaı óndirý deńgeıin kezeń-kezeńimen birneshe jylda 6-6,5 mln tonnaǵa jetkizip, osy kórsetkishti aldaǵy 10 jyl boıy saqtap turýǵa múmkindik beredi dep kútiledi.

«Ázirlenip jatqan jospar Jańaózen qalasynyń áleýmettik-ekonomıkalyq turaqtylyǵyn qamtamasyz etýge de eleýli úles qosady. Búginde «Ózenmunaıgaz» munaı óndirý kórsetkishterin tolyq oryndaı almaı otyr. Tehnıkalyq jáne geologııalyq máselelerge baılanysty munaı óndirý kólemin birqalypty deńgeıde ustap turý qıynǵa soǵýda», - deıdi Maǵzum Myrzaǵalıev.

Ulttyq kompanııa basshysynyń aıtýynsha, jyl saıynǵy kúrdeli salymdardyń deńgeıine qaramastan, ÓMG ken oryndarynda munaı óndirý kólemi azaıyp barady. Bunyń saldarynan kompanııanyń kirisi de tómendep, qazirgi qyzmetkerler sanyn saqtap qalýǵa jáne olarǵa eńbekaqy tóleý boıynsha áleýmettik mindettemelerdi oryndaý da qıynǵa soǵýy múmkin. M.Myrzaǵalıev «Ózenmunaıgaz» AQ munaı óndirý rentabeldiginiń shegine 2024 jyly keletinin basa aıtty.

Jumys sapary Aqtaýda jalǵasty. Munda Mańǵystaý oblysynyń kásipodaq basshylarymen kezdesý ótti. Jıynda eńbek ujymdaryndaǵy qordaly máseleler, sonyń ishinde eńbekaqy jáne elektr energııasynyń kenishterde jıi óshirilýi talqylandy. QMG Basqarma tóraǵasy Jańaózen qalasyn damytýǵa baǵyttalǵan jobalarǵa bólek toqtaldy. Atap aıtsaq, «Astrahan-Mańǵyshlaq» magıstraldy sý qubyryn qaıta qurý, Kendirlide sý tuşytý zaýytyn jáne Jańaózende jańa gaz óńdeý zaýytyn salý jumystary kezekte tur.

Jańaózen qalasyna áleýmettik qoldaý kórsetý aıasynda kompanııa eki sport kesheniniń qurylysyn aıaqtap qaldy, Oqýshylar saraıy jobasy boıynsha jumystar bastalyp, 16 sport alańyn salý sheshimi qabyldandy.