Mańǵystaýda múmkindigi shekteýli jumyssyz áıelderdi oqytýǵa 1,5 mln teńge bólindi

AQTAÝ. QazAqparat - Aqtaýda ótken jyldyń aıaǵynan bastap jumys isteıtin «Órkenıetti keleshek» atty qoǵamdyq qordyń alǵashqy jobasy aıaqtalýda. BUU men Úkimettiń «Ornyqty damý men áleýmettik-ekonomıkalyq jańǵyrtýǵa qol jetkizýde Mańǵystaý oblystarynyń múmkindikterin keńeıtý» birlesken jobasyn granttyq qoldaýda qor 10 jumyssyz áıeldi oqytýdy bastady.

Jobaǵa qatysýshylar ishinde - bilimi joq kishkentaı balalarmen analar, oralman, az qamtylǵan, kereń-mylqaý, múgedek áıelder bar, olardy shash qııýǵa jáne manıkıýr isine úıretedi.

 «Joba qatysýshylaryn ashyq iriktedik, áleýmettik jeli arqyly ár sanattar arasynan úmitkerler izdeý týraly jarnama tarattyq. Jumyssyz, qoldaýsyz, kómeksiz qalǵan, aýyr jaǵdaıda qalǵan áıelderdi izdedik. Bizdiń áriptesimiz - jetekshi, belgili sulýlyq stýdııalardyń biri - «El» (Delux).   Grant somasy 1 mln 350 myń teńgeni quraıdy. Ár qatysýshyǵa jumys isteý úshin tegin bazalyq jabdyq, aspaptar usynylady», - dedi «Órkenıetti keleshek» basshysy Gúlbarshyn Qarabalına.

Shashtarazdardy 2 aı oqytady. Qazir qatysýshylar jarty kýrstan ótti. Bir aıdan soń olarǵa tıisti sertıfıkattar beriledi. Manıkıýr men pedıkıýr sheberlerine oqytý keıinirek bastaldy.

Barlyq qatysýshylar áleýetti jumys berýshilerge sheberlik synybyn kórsetedi.