Mańǵystaýda memlekettik qyzmettegi bos oryndar sany azaıdy

AQTAÝ. QazAqparat – Óńirde memlekettik qyzmetten óz betimen ketkender sany tómendep, aýyl ákimdikterinde kadr tapshylyǵy joıylǵan. Bul týraly aýmaqtyq departament basshysy Nurgúl Jannazarova óńirlik kommýnıkatsııalar qyzmetinde ótken brıfıngte málim etti, dep habarlaıdy QazAqparat.

Úsh jyl buryn memlekettik qyzmetshilerge eńbek aqy tóleýdiń jańa faktorly-baldyq shkalasy engizilgeli salada oń ózgerister baıqalǵan.

Spıkerdiń málimetinshe, Mańǵystaýdyń eńbek naryǵynda memlekettik qyzmettiń básekelestik qabileti artty (mysaly, jeke sektordan memlekettik qyzmetke ornalasqandar sany 6 esege artqan. Mańǵystaý ákimdiginde bos oryndar sany 7,5%-ǵa deıin azaıdy (2017 jyly – 11,8 %(159 birlik), 2019 jyly 4,3% (58 birlik).

«Mańǵystaýda aýyl ákimdikterinde kadr tapshylyǵy joıylǵan (2017 jyly aýyl ákimdikterindegi bos oryndar sany 28-den (shtat sanynyń 12,6%-y) 2019 jyldyń qorytyndysy boıynsha 6 orynǵa deıin (2,7%) azaıdy. Memlekettik qyzmetke mańǵystaýlyqtardyń qyzyǵýshylyǵy artqan (bir orynǵa úmitkerler sany 2017 jyly 0,9 adam, 2018 jyly 2,6 adam, 2019 jyly 2,9 adam). Memlekettik qyzmetshiler eńbeginiń tıimdiligi artýy baıqalady. Mańǵystaý ákimdiginde biliktiligi joǵary mamandar qatary kóbeıdi («Bolashaq» baǵdarlamasy men Memlekettik basqarý akademııasynyń túlekteri 3-ten 7 adamǵa deıin ósken»,- deıdi Nurgúl Jannazarova.

Sonymen qatar, Mańǵystaý oblysy jergilikti atqarýshy organdarynyń memlekettik qyzmetshileri respýblıka boıynsha úzdikter qatarynda top jardy. 2019 jyly respýblıka boıynsha eń úzdik dep tabylǵan 10 memlekettik qyzmetshiniń ekeýi mańǵystaýlyq boldy.