Mańǵystaýda mektep túlekteri týyp-ósken aýylyna tý ornatyp berdi

AQTAÝ. QazAqparat - Mańǵystaýda mektep túlekteri týǵan aýylyna erekshe tartý jasady, dep habarlaıdy QazAqparat.

Beıneý aýdanyna qarasty Eset aýylyndaǵy mekteptiń 2002 jylǵy túlekteri aýyl ortalyǵyna tý tuǵyryn ornatty.

Beıneý aýdany ákimdigi baspasóz qyzmetiniń málimetinshe, tý tuǵyrynyń bıiktigi - 9 metr. Jalpy aýdany 36 sharshy metr aýmaqty alyp jatyr.

Qazaqy oıý-órnekpen bezendirilip, turǵyndardyń bos ýaqytyn tıimdi paıdalaný úshin jaraqtandyrylǵan.

25 mamyr kúni ashylý saltanaty ótip, oǵan aýyl turǵyndary men aqsaqaldary, ardager ustazdar men mektep túlekteri qatysty.

- Mektebimizdiń 20 jyldyq túlekteriniń atynan tý tuǵyryn ornatý jóninde birneshe kún buryn usynys túsken bolatyn. Qýana qabyldap, tuǵyr ornalasatyn jerin belgilep, qujattaryn rettedik. Túlekterdiń bul syıy aýyl turǵyndarynyń kóńilinen shyqty. Endi bul aýylymyzdyń sánin keltirip, kógimizde kók baıraǵymyz jelbirep turatyn bolady, -deıdi Eset aýylynyń ákimi Amandyq Іzbasarov.