Mańǵystaýda mamandar MRT tekserýden tegin ótýge tıis naýqastardan aqsha alyp otyrǵan

AQTAÝ. QazAqparat - Onkologııa kúdigi bar naýqastar magnıttik-rezonanstyq tomografııa men kompıýterlik tomografııaǵa tegin túsýi kerek. Alaıda, óńirdegi keıbir mamandar aılasyn asyryp, tekserýden ótýge kelgen turǵyndardan aqy alyp kelgen, dep habarlaıdy QazAqparat tilshisi.

Saladaǵy paraqorlyqty Sybaılas jemqorlyqqa qarsy agenttiktiń oblystyq departamentiniń mamandary anyqtady. Qazirgi tańda sotqa deıingi tergeý júrip jatyr.

Aǵa tergeýshi Álı Abdýlovtyń aıtýynsha, mamandarmen birge dárigerler de zańsyzdyqqa barǵan. Olar qarajattyń belgili bir mólsherin alyp otyrǵan. Olarǵa qatysty densaýlyq saqtaý basqarmasyna shara qoldaný týraly usynys jiberilgen.

Jalpy, memlekettik bıýdjetten qymbat zertteýlerdi júzege asyrý maqsatynda 37 mln teńge bólinip, oblystyq dıspanser medıtsınalyq uıymdarmen kelisimshartqa otyrǵan. Osy ýaqytqa deıin onyń 27 mıllıony ıgerilgen.

«Onkologııalyq dıspanser óz kezeginde kelisimshartqa otyrǵan «Invivo» sııaqty mekemelerge naýqastardy joldap otyrǵan. Turmystyq jemqorlyqtyń aldyn alý maqsatynda sybaılas jemqorlyq áshkerelenýde. «Invivo» mekemesiniń qyzmetkeri aldaý jolymen shamamen 20-25 adamnan 300 myń teńgege jýyq aqshany aldap alǵan. Olardyń barlyǵy dárigerdiń joldamasymen kelgen. Oǵan qatysty alaıaqtyq boıynsha is qozǵalyp, tıisti sharalar qoldanylady»,-dedi Q R Sybaılas jemqorlyqqa qarsy is-qımyl agenttiginiń oblys boıynsha departamentiniń aǵa tergeýshisi Álı Abdýlov.