Mańǵystaýda qyzmetin asyra paıdalanǵan onkologııa dıspanseriniń basshysyna qatań sógis berildi

AQTAÝ. QazAqparat - Mańǵystaý oblystyq onkologııalyq dıspanseri basshysynyń qyzmetin asyra paıdalanǵany anyqtaldy. Ol týǵan qyzyn laýazymdy qyzmetke taǵaıyndap, tártiptik jazaǵa tartylǵan birqatar qyzmetkerge memlekettik bıýdjetten negizsiz syıaqy bergen, dep habarlaıdy QazAqpara tilshisi.

QR Sybaılas jemqorlyqqa qarsy is-qımyl agenttiginiń Mańǵystaý oblysy boıynsha departamenti basshysynyń birinshi orynbasary Qýanysh Myrzaǵalıdyń málimetinshe, memlekettik satyp alý tikeleı shart jasaý arqyly bir kózden alý faktisimen jasalǵan.

Dıspanser basshysy memlekettik satyp alý kezinde jalpy somasy 2 600 000 teńgeni jubaıynyń atyna tirkelgen seriktestikke aýdarǵan.

«Mysaly 2020 jyly shilde aıynda «Metaka» JShS-men jalpy somasy 1 270 000 teńgeni quraıtyn dezınfektsııalaýǵa arnalǵan týnnel kamerasy, temperatýrany ólsheıtin qurylǵy osyndaı jolmen satyp alynǵan. Sondaı-aq, byltyr naýryz aıynda jalpy somasy 4 mln teńgeden asatyn konferentsııalardy uıymdastyrý jáne respıratorlar shart jasalmaı satyp alynǵan. Budan basqa taldaý barysynda dıspanserde 2019 jyly jumyskerlerdi oqytý boıynsha kórsetilgen qyzmetterdi satyp alý qaǵaz nusqada jasalǵan memlekettik satyp alý qujattary joǵalǵany anyqtaldy. Keı kelisimsharttyń resmı qujaty da bolmaı shyqty», - dedi ol.

Antıkor ortalyǵynyń mamandary atalǵan zańbuzýshylyqtar boıynsha hattama toltyryp, quzyrly organdarǵa joldaǵan.

Dıspanser basshysyna qatań sógis jarııalanǵan.