Mańǵystaýda qutyrmamen aýyrǵan maldyń ıelerine ótemaqy tólenedi

ASTANA. QazAqparat - Mańǵystaý oblysy Mańǵystaý aýdanynda malynan qutyrma aýrýy anyqtalǵan sharýalardyń shyǵyny respýblıkalyq bıýdjettiń esebinen óteledi, dep habarlaıdy «QazAqparat» HAA tilshisi.

«Búgingi kúngi epıdemıologııalyq jaǵdaı týraly aıtyp ótsem. Mańǵystaý oblysynyń Mańǵystaý aýdanyndaǵy 1-2 aýlanyń túıe men jylqysy qutyrma indetimen tirkeldi. Onyń dıagnozy naqtyly laboratorııalyq zertteýlermen qoıyldy. Tekserý kezinde bul maldardyń arasynan enterotoksemııa indeti de anyqtaldy», - dedi QR AShM Veterınarlyq baqylaý jáne qadaǵalaý komıtetiniń tóraǵasy Tursyn Qabdoldanov Astanada ótken baspasóz máslıhatynda.

Komıtet tóraǵasynyń aıtýynsha, búgingi kúni Mańǵystaý óńirinde komıtet ókilderi jáne «Qazaq veterınarlyq ınstıtýtynyń» ókilderi bar arnaıy top jumys júrgizip jatyr.

«Bul máselege baılanysty aýyl men aýdan ákiminiń sheshimi shyǵarylyp, ony joıý sharalary júrgizilýde. Arnaıy vaktsına qordan bólindi. Dezınfektsııa sharalary jasalýda. Bul aýrýdyń dıagnozy anyqtalǵan maldardyń shyǵyny mal ıesine respýblıkalyq bıýdjetten tolyqtaı tólenip beriledi», - dep túıdi Tursyn Qabdoldanov.

Eske sala ketsek, buǵan deıin Mańǵystaý oblysynda janýardyń qutyrý aýrýy boıynsha 5 derek anyqtalǵany habarlanǵan bolatyn.

Budan keıin taǵy óńirde taǵy 14 janýardyń qutyrý deregi tirkeldi. Tórt túlik maldyń ishinde túıe, jylqy, sıyr osy indetke shaldyqqan.