Mańǵystaýda koronavırýs juqtyrǵan 34 bala aýrýhanada emdelip jatyr

AQTAÝ. QazAqparat - Mańǵystaýda epıdemıologııalyq jaǵdaı kúrdelenip barady, dep habarlaıdy QazAqparat tilshisi.

Bul týraly óńirdiń qoǵamdyq kommýnıkatsııa ortalyǵynda ótken brıfıngide Mańǵystaý oblysy ákiminiń orynbasary Gúlmıra Qalmuratova málim etti.

Onyń aıtýynsha, shilde aıynyń basynda statsıonarlarda 200-den astam adam koronavırýsqa qarsy em alsa, búginde olardyń sany 874-ke jetken.

Oblystyq «Ana men bala» ortalyǵynda 72 áıel em qabyldap jatyr. Qys mezgilinde qaýipti vırýs juqtyrǵan áıelder sany shamamen 20-dan aspaıtyn.

Sondaı-aq, Mańǵystaýda qazirgi ýaqytta KVI juqtyrǵan 34 bala aýyryp jatyr. Taǵy 7 bala pnevmonııaǵa shaldyqqan.

«Oblystyq balalar aýrýhanasynda - 23 bala, Jańaózen aýrýhanasynyń kovıd bóliminde - 17 bala, Mańǵystaý aýdanynyń aýrýhanasynda bir bala em qabyldap jatyr. Jalpy adamdar jumys ornynda aýrýdy jıi juqtyrady. Keıin vırýs úıindegilerge taraıdy», - dedi oblys ákiminiń orynbasary.

Al oblystyq densaýlyq saqtaý basqarmasy basshysynyń orynbasary Amanbek Jumyrov turǵyndarǵa óz betimen antıbıotıkter qabyldamaýǵa shaqyrdy.

«Vırýsqa qarsy preparattardy taǵaıyndaýǵa jáne antıbıotıkter alýǵa qatań tyıym salynady. Búginde jaǵdaı kún saıyn nasharlaı túsýde. Shildeniń 27 kúninde qaýipti indet juqtyrǵan 4532 jaǵdaı tirkeldi. Qazir jaǵdaıy aýyr naýqastar modýldik aýrýhanada jatyr. Jaǵdaıy turaqtalǵannan keıin olardy provızorlyq bólimshege aýystyrady», - dedi Amanbek Jumyrov.

Oblysta eki myńnan astam adam ambýlatorııalyq em alyp jatyr. Olardyń jaǵdaıyn 119 mobıldi brıgada baqylaıdy.