Mańǵystaýda qoqys polıgondary qaı aýyldarǵa salynatyny belgili boldy

NUR-SULTAN. QazAqparat – «Aqtaý teńiz porty» arnaıy ekonomıkalyq aýmaǵynda salynatyn bekire zaýytyna ınvestıtsııalyq sýbsııadııa bólinetin boldy. Bul týraly Ekologııa, geologııa jáne tabıǵı resýrstar mınıstri Serikqalı Brekeshev Úkimet otyrysynda aıtty, dep habarlaıdy QazAqparat tilshisi.

«Jeke ınvestıtsııa esebinen balyq sharýashylyǵy boıynsha 30 mıllıard teńge somasyna 3 joba iske asyrylady. Onyń ishinde «Aqtaý teńiz porty» arnaıy ekonomıkalyq aýmaǵynda bekire zaýytyn salý jobasy bar. Nátıjesinde óndirilgen balyq kólemi 30 tonnadan 10,6 myń tonnaǵa deıin ulǵaıady, 3 myńnan astam jańa jumys oryndary ashylady. Mınıstrlik tarapynan ınvestıtsııalyq sýbsıdııalar bólinedi. Oǵan qosa oblys ákimdigimen ınfraqurylymdy qurý jáne jem-shópke, balyq ósirý materıalyna jáne dárilik preparattarǵa sýbsıdııalar bólý boıynsha sharalar qabyldanady», - dedi mınıstr.

Sondaı-aq, ol óńirdiń ekologııalyq jaǵdaıyn jaqsartý úshin «Qoshqar ata» qaldyq qoımasyn rekýltıvatsııalaý jumysy bastalǵanyn atady.

Aıtýynsha, bıyl bul jobaǵa bir mıllıard teńge bólingen.

«Sondaı-aq, óńirdi damytýdyń keshendi josparynda zertteýler júrgizý, qorshaǵan ortaǵa áserdi aıqyndaý jáne burynǵy Aqtaý plastıkalyq massalar zaýytynyń aýmaǵynda ornalasqan ıesiz qaldyqtardy kádege jaratý qarastyrylǵan.

Qaldyqtardy basqarý salasynda Aqjigit, Jyńǵyldy, Aqshuqyr, Shapaǵatov aýyldarynda turmystyq qatty qaldyqtar polıgonyn salýdy kózdep otyrmyz. Bul qaldyqtardy qaıta óńdeý úlesin ulǵaıtýǵa múmkindik beredi», - dedi vedomstvo basshysy.

Serikqalı Berkeshevtiń sózine qaraǵanda, «ÓzenMunaıGaz» kompanııasy 1,4 mıllıon tonna munaı qaldyqtaryn joıý jáne kádege jaratý jumysyna 12,6 mlrd teńge jumsamaq.