Mańǵystaýda kıim tigetin tseh maska óndirisin qolǵa aldy

AQTAÝ. QazAqparat - Koronavırýs pandemııasy týdyrǵan álemdegi qolaısyz jaǵdaı aldymen shaǵyn jáne orta bızneske ońaı tımegeni anyq. Onyń ústine pandemııanyń alǵashqy tolqynynda álem boıynsha medıtsınalyq maska jetispeýshiligi baıqaldy. Qıyn kezeńde keı kásipkerler bıznesin jańa arnaǵa buryp, karantın talabyna beıimdele bastady. Sonyń biri - mańǵystaýlyq kásipker Áıgerim Іlııasova. QazAqparat tilshisi maska tigip, karantın kezinde jumysshylaryn qysqartpaı, kásibin dóńgeletip otyrǵan kásipkerdiń suhbatyn nazarlaryńyzǵa usynady.

- Áıgerim, bızneske kelýińizge ne túrtki boldy?

- Buǵan deıin qarjy salasynda birneshe jyl jumys istedim. Bıyl bızneske kelgenime 4 jyl bolady. 2016 jyly aıaǵym aýyr kezde kishkentaıyma jaıalyq, jórgek, qolǵap sııaqty qajetti kıimderdi izdedim. Balama otandyq ónim alǵym kelip, naryqty zertteı bastadym. Sóıtsem kóbi - Reseı, Belarýs pen Qytaıdan kelgen taýarlar.

Men unatqandarynyń baǵasy óte qymbat boldy. ıAǵnı qarapaıym halyqqa qoljetimdi baǵamen sapaly ónim tappadym. Sodan mata satyp alyp, balama qajetti dúnıelerdi úıden tige bastadym. Kórgen adamdar qaıdan satyp alǵanymdy suraı bastady. Ózim tikkenimdi aıtqanda, tapsyrys qabyldaýymdy ótingender boldy. Sodan qolymnan kelgen dúnıeni satyp, nege bıznes ashpasqa degen oı keldi.

Basynda úıden tiktim. Bir aıdan keıin tsehta jumys istedim. Jarty jyldan soń qasyma ózime sııaqty qyzdardy jınap, úlken tseh ashtym. Búginde ujymda 15-ke jýyq adam jumys isteıdi. Bıyl Jumyspen qamtý ortalyǵymen kelisimshart jasaldy. Biz ortalyqqa tirkelip, eki qolǵa bir kúrek izdep júrgenderdi qatarymyzǵa qabyldaımyz. Jumys beremiz. Ikemi barlardy úıretemiz. Sóıtip, maman daıyndaımyz.

Áıtpese, qazir jaqsy tiginshilerge suranys bar. Ózderińizge málim búginde adamdar qalaýyna saı kıinedi. Sondyqtan bizde jumys istegender jeke bıznes ashyp ketip jatady. Mine, sondaı ýaqytta ujymda qajettilik týyndaıdy.

- Maska tigýdi qashan qolǵa aldyńyz?

- Maskany 2020 jyldyń qańtarynan bastap tiktik. Qańtarda dosym Ońtústik Koreıadan keldi. Ekeýara áńgime kezinde álemdegi ahaýal jaıyn talqyladyq. Ol kezde Kytaıda belgisiz vırýstyń tarap, Azııa elderine de jetkenin estip, oqyp otyrdyq. Sol ýaqytta dosym bul indettiń salqyny kórshiles jatqan qazaq eline jetetinin aıtty.

Sóıtip, maǵan maska tigýdi qolǵa al degen keńes aıtty. Basynda onsha senbesem de nege kórmeske degen oı keldi. Aldymen, balalarǵa arnalǵan betperde tiktim. Keıin suranys túskesin eresekterge arnalǵan maskany tiktik. Naýryz aıynda Aqtaý qalasyna qajetti maskanyń 20 paıyzyn biz tiktik.

- Matany qaıdan alasyzdar?

- Matany Reseı, Qytaı men Túrkııadan tapsyryspen aldyrtamyz. 100 paıyz maqtadan jasalǵan maska bolýy kerek. Óıtkeni, maskany tigýdiń ózindik tártibi bar. Belgili erejelerge súıene otyryp tigemiz. Maska demalýǵa yńǵaıly bolýy kerek.

- Tapsyrys berýshi mekemeler bar ma?

- Qazir Qazaqstan boıynsha tapsyrys qabyldaımyz. Shetelge de otandyq ónimdi jiberdik. Balalarǵa arnalǵan maska - 300 teńge, eresekterge arnalǵany - 400 teńgeden bastalady. Kóterme baǵa bar. 100 shtýktan alatyn mekemelerge arzan baǵada satamyz.

Naýryz-sáýir aılarynda kúnine 200-300 betperde tiktik. Óıtkeni, ol ýaqytta suranys boldy. Qazir kúnine 50 maskaǵa deıin tigemiz. Qazir suranysqa qaraı tapsyrys alyp jatyrmyz. Biraq tapsyrys azaıdy qol qýsyryp otyrǵan joqpyn. Menińshe, qazir kez-kelgen adamnyń bıznes ashýyna múmkindik bar.

Yńǵaıly keńse taýyp, jaqsy ujymmen jumys isteýge bolady. Onyń ústine taýarlaryńdy áleýmettik jelide jarnalaısyń. Tynbaı eńbek etken adam nesibesiz qalmaıdy. Búginge deıin memleketten nesıe almadym. Múmkin bolashaqta kásibimdi keńeıtip jatsam, memlekettiń qoldaýy qajet bolar.

Ázirge óz qarjymyz jetip otyr. Tamyr-tanyssyz, kásipti nólden bastaǵan adam retinde aıtarym osy.

- Áńgimeńizge rahmet.