Mańǵystaýda kenshiler taýyp alǵan aqqutan ólimine túsinik berildi

AQTAÝ. QazAqparat - Mańǵystaýda aqqutan qusynyń ólimine qatysty Orman sharýashylyǵy jáne janýarlar dúnıesi komıteti túsinik berdi, dep habarlaıdy QazAqparat.

Eske sala keteıik, 23 shilde kúni áleýmettik jelilerde «Dýnga» ken ornyna aqqutan qusy qonyp, ushyp kete almaı turǵany týraly beınejazba tarady.

«Dýnga» ken orny Mańǵystaý oblysynda, Aqtaý qalasynan 50 shaqyrym jerde ornalasqan.

«Inspektsııa mamandary sol kúni keshke ken ornynyń qyzmetkerimen baılanysqa shyǵyp, jol-jónekeı kólik bolǵan kezde qusty berip jiberý týraly kelisimge kelgen bolatyn. Alaıda ken ornynda jumys ýaqytynyń aıaqtalýyna baılanysty bul is tańǵy ýaqytqa qaldy» dep habarlady komıtetten.

Alaıda qus sol túni ólip qalǵan. Boljam boıynsha, qonys aýdarý kezinde aqqutan álsirep, usha almaıtyn jaǵdaıǵa jetken bolýy múmkin.

Aqqutan - jyl qusy. Ol Kaspıı teńiziniń soltústiginde kezdesedi.