Mańǵystaýda qasıetti oryndarda qoqys tastaǵandarǵa aıyppul salynady

AQTAÝ. QazAqparat - Mańǵystaý oblysynda qoqysty ruqsat etilmegen jerge tógetinderge baqylaý kúsheıtildi. Bul týraly qoǵamdyq kommýnıkatsııa ortalyǵynda ótken brıfıng barysynda jergilikti polıtsııa basqarmasy bastyǵynyń mindetin atqarýshy Bilimǵalı Sultanov málim etti, dep habarlaıdy QazAqparat.

Sondaı-aq, endi tarıhı mańyzy bar jerlerdiń tazalyǵyna nemquraıly qaraıtyn tártip buzýshylarǵa da aıyppul salynady.

- Ásirese, jaz aılarynda qoqys máselesi ózekti. Kún ystyǵyna baılanysty aýaǵa qolańsa ıis taraıdy. Budan qorshaǵan orta da, adam da zardap shegedi. Jyl basynan beri tabıǵatty qorǵaý polıtsııasy 6 myń adamǵa aıyppul saldy jáne bul jumys aldaǵy ýaqytta kúsheıtiledi, - deıdi Bilimǵalı Sultanov.

Spıkerdiń málimetinshe, qorshaǵan orta tazalyǵyn saqtamaıtyn azamattarǵa osy ýaqytqa deıin 24 mıllıon 925 myń teńge aıyppul salynǵan.

Aıyppul arqalǵandardyń basym bóligi qaryzynan qutylǵan.

Dese de, tazalyq saqtamaı tártip buzǵandar arasynda áli de bolsa aıyppuldan jaltaryp júrgender bar. Olarǵa aldaǵy ýaqytta shara qoldanylady.

Sonymen qatar, ekologtarmen birigip júrgizilgen reıdter nátıjesinde tártip buzýshylar arasynda tek tabıǵatty lastaǵandar ǵana emes, jasyl jelekke nuqsan keltirgen azamattar da anyqtaldy.

Olarǵa da óz kezeginde tıisti shara qoldanylyp, aıyppul salyndy.

Brıfıngte tabıǵı resýrstar jáne tabıǵat paıdalanýdy retteý basqarmasynyń basshysy Dúısen Qusbekovte oblystyń kıeli jerlerine zııan keltiretin is-áreketterge jol berilmeıtinin, olardy qoqys toly aımaqqa aınaldyrýǵa jol bermeıtinin atap ótti.

- Jyl saıyn, tipti apta saıyn qasıetti jerlerden tonna qoqys shyǵarylady. Adamdardyń ózderi lastaıdy. Munyń barlyǵy - mádenıetsizdikten, týǵan jerine, eline degen syılastyqtyń, tabıǵatyna degen janashyrlyqtyń joqtyǵynan, - dedi Dúısen Qusbekov.

Spıker keltirgen aqparatqa sáıkes, 2021 jyly oblys boıynsha 103 zańsyz qoqys tastaý orny tirkelgen.

Olardy joıý maqsatynda júrgizilip jatqan jumys baıaý, ásirese Jańaózen qalasynda - bir jyl ishinde 38 qoqys ornynyń tek 4-i ǵana jınalǵan.

Qalǵan qoqys oryndarynyń birin qaldyrmaı joıý bıylǵa josparlanyp otyr.