Mańǵystaýda iri qara maldyń sany 19,1 paıyzǵa artqan

AQTAÝ. QazAqparat - Búgin oblys ákimi Eraly Toǵjanovtyń tóraǵalyǵymen aýyl sharýashylyǵynyń damýy jóninde otyrys ótti, dep habarlaıdy QazAqparat óńir ákimdiginiń baspasóz qyzmetine silteme jasap.

Qazirgi tańda qala jáne aýdan ákimdikteriniń málimetine sáıkes, oblysta mal sharýashylyǵymen aınalysatyn shamamen 1000 sharýa qojalyǵy bar. Mańǵystaý oblystyq aýyl sharýashylyǵy basqarmasynyń basshysy Serik Qaldyǵuldyń aıtýynsha, onyń ishinde: asyl tuqymdy mal sharýashylyǵy boıynsha 30 sýbekti tirkelgen. Qoı sharýashylyǵynda - 3 (qoı - 10 481 bas), jylqy sharýashylyǵynda - 17 (jylqy - 3091 bas), túıe sharýashylyǵynda - 8 (túıe - 1709 bas) jáne sıyr sharýashylyǵynda - 2 sharýashylyq (sıyr - 312 bas) tirkelgen. Jalpy alǵanda oblys kóleminde asyl tuqymdy mal basynyń sany 15 593 bas bolyp otyr.

Sondaı-aq, qazirgi tańda shóp shabý jumystarymen oblys boıynsha 30 brıgada aınalysýda.

Statıstıkalyq málimetke sáıkes, osy jyldyń 6 aıynda - iri qara mal sany - 23 410 bas bolyp, 19,1% ǵa, qoı-eshki - 532 708 bas bolyp, 3,7% ǵa, jylqy - 92 954 bas bolyp, 11,5% ǵa, túıe - 69 966 bas bolyp, 11,8% ǵa, barlyq mal sany - 719 038 basty qurap, 5,6% artyp otyr.

«2017 jyly 1030 gektar jerge kókónis-baqsha daqyldary egilip, odan 15 800 tonna ónim alyndy. Al bıyl 1100 gektar jerge egin egilip, 16 800 tonna kókónis, baqsha ónimderi alynady dep josparlanǵan bolatyn, degenmen jańadan qosylǵan jylyjaılar esebinen bul kórsetkishti 18 000  tonnaǵa deıin jetkizýdi maqsat etip otyrmyz. Oblysta 2016-2017 jyldar aralyǵynda barlyǵy 20 aýyl sharýashylyǵy kooperatıvi quryldy. Qazirgi tańda sonyń 13-i jumys istep tur. 6 kooperatıv óz jumysyn toqtatty», - deıdi Mańǵystaý oblystyq aýyl sharýashylyǵy basqarmasynyń basshysy Serik Qaldyǵul.

Respýblıka boıynsha egin sharýashylyǵyn tsıfrlandyrý tapsyrmasynyń birinshi kezeńi - óńirdegi egistik alqaptardy tsıfrlandyrý boıynsha jyl basynan beri oblysymyzdyń kartaǵa engizilgen aýmaq - 1160,08 ga qurady.

QR Nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan memlekettik baǵdarlamasy aıasynda 2017 jyly oblysqa 474 mln teńge bólinip, tolyqtaı ıgerilgen bolatyn. Nátıjesinde 130 adamǵa nesıe berilip, shamamen 219 adam jumyspen qamtyldy.

Bıylǵa bólingen qarjy - 1 244 mlrd teńgeni qurap, ótken jylmen salystyrǵanda - 3 esege kóbeıip otyr. Osy qarajatty tolyq ıgergen jaǵdaıda, shamamen 500 adamǵa nesıe berilip, 750 adam jumyspen qamtylady dep kútilýde.