Mańǵystaýda ǵarysh monıtorıngi 89 jerden zańsyz qoqys úıindisin tapty

AQTAÝ. QazAqparat - «Qazaqstan ǵarysh saparynyń» ǵaryshtyq monıtorıng kómegimen mamandar bıyl Mańǵystaý oblysyndaǵy 89 núktede ruqsat etilmegen qoqys úıindisin anyqtaǵan, dep habarlaıdy QazAqparat tilshisi.

Onyń 52-si búginge deıin joıylǵan.

«Birneshe jeke tulǵaǵa aıyppul salyndy. Jalpy óńirde turǵyndar sany kúrt ósip jatyr, sondyqtan turmystyq qatty qaldyqtar da kóbeıedi», - dedi Mańǵystaý oblystyq tabıǵı resýrstar jáne tabıǵat paıdalanýdy retteý basqarmasy basshysynyń orynbasary Esenqos Ádilbaev.

Óńirde Aqtaý qalasy, Túpqaraǵan jáne Qaraqııa aýdandaryndaǵy qoqys úıindileri tolyq joıylǵan.

Al Jańaózen qalasyndaǵy 55 úıindiniń 28-i, Munaıly aýdanyndaǵy 14 qoqystyń 4 núktesi ǵana tazalanǵan.