Mańǵystaýda eriktiler teńiz túbindegi qoqysty jınady
16:10, 17 Tamyz 2021
AQTAÝ. QazAqparat – Mańǵystaýdyń Túpqaraǵan aýdanyndaǵy Saıyn Shapaǵatov aýyldyq okrýginiń ákimi Saıran Qylysh eriktilermen birge teńiz túbindegi qoqysty jınady, dep habarlaıdy QazAqparat tilshisi.
Aýyl ákimi arnaıy sý asty kıimin kıip, qurlyqtan 100 metr qashyqta teńiz túbinen eriktilermen birlese otyryp 3 tonnaǵa jýyq qaldyqty shyǵarǵan.
«Biz osyǵan deıin eldimeken turǵyndarynyń nazaryn aýyl ishindegi qoqystarǵa aýdaryp keldik. Degenmen, qoqystardyń bir bóligi teńiz astynda ekendigi jasyryn emes. Bul bastamanyń maqsaty - teńiz astyndaǵy qoqystardy aıtarlyqtaı tazalap tastaý emes. Árıne, bul alǵashqy qadamnan múmkin emes. Basty maqsatymyz - turǵyndar nazaryn aýdarý, teńiz jaǵalaýyna demalý mádenıetin qalyptastyrý»,- dedi Saıran Qylysh.