Mańǵystaýda ekzotıkalyq qustar ósiriledi
Boranbaı Qarjaýbaevtyń sharýa qojalyǵy naǵyz qus patshalyǵy ispetti. Munda 1500 bódene, 1 myńǵa jýyq qaz, 30 qyrǵaýyl, túıequstyń 15 túri, jalpy 4350-deı qus bar.
«Fermany 2017 jyly naýryz aıynda qurdym. Bes túıequsty baǵýdan bastalyp ketken kásip desem bolady. Búginde ıeligimde sırek kezdesetin qustar men úı jaǵdaıynda baǵýǵa bolatyn túrli qanattylar bar. Paıda tabýdan bólek negizgi maqsatym, Qazaqstannyń kez kelgen turǵyny qalaǵan ýaqytynda qustarmen tanysyp, tabıǵı taza ónimnen dám tatyp, demalyp ketetindeı oryn jasaǵym keledi. Negizinen ekotýrızmdi damytýdy kózdeımin. Ol úshin bolashaqta sharýashylyqty keńeıtkim keledi. Qazirdiń ózinde mektep oqýshylary kelip turady. Osy jerdi demalys ornyna aınaldyrsam deımin»,-dedi Boranbaı Qarjaýbaev.
Fermer ekzotıkalyq qustardyń jumyrtqalary paıdaly ekenin aıtady. Ásirese, adam densaýlyǵyna tıgizer shıpasy zor. Sondyqtan ınkýbator alyp, jumyrtqa men balapan shyǵarýdy da qolǵa alǵan.
«Máselen, straýstyń bir jumyrtqasy 1,5 keli tartady. Qýyryp tamaq qylǵanda 16 adamǵa tamaq bolady. Belok kóp - 24 paıyzǵa deıin barady. Holesterın joq. Emdik qasıeti zor. Straýstyń ózi 70 jyldaı ómir súredi. Júgirgende 70 shaqyrymmen bir saǵattyń tóńireginde jyldamdyǵyn túsirmeıdi. Eti óte paıdaly. Boılary - 2,5 metr. Salmaǵy qazirdiń ózinde 120-140 keli tartady. Tek etiniń ózi 40-45 keli beredi», - deıdi Boranbaı sharýa.
Oǵan sharýashylyqpen eki uly Beken men Esen kómektesedi. Olar árbir qustyń kútiminiń ereksheligin aıtýda.
«Іri qustar byltyr kóktemde jetkizildi. Olardyń ósimi tez. Úlkenderi 4-5 jasta, balapandary úsh aptalyq. Ár qustyń tamaǵy ártúrli. Arpa, bıdaı, qospa jem, barlyǵyn Qostanaıdan alamyz. Ásirese, túıequstyń kútimi erekshe. Qysta saq bolý kerek. Sebebi túıequs muzǵa shalynyp qulasa, aıaǵy synady. Sosyn jaramaı qalady. Terisi qoltyraýynnyń terisimen birdeı. Baǵaly, sapaly. Túrli áshekeı buıymdar, aıaq-kıim, kıim-keshek daıyndaýǵa bolady. Taǵy bir aıta ketetin ereksheligi, túıequstyń júnine shań jabyspaıdy. Qyrǵaýyldyń 10-ǵa tarta túri bar. Іshinde patsha, qyzyl-altyn sııaqty keń taraǵan túrleri jáne lımon ári kúmis tústileri de kezdesedi. Jubynyń quny 10 myńnan bastap 100 myń teńgeden asady», - deıdi Esen Boranbaı.
Sharýa qojalyǵy úı qustaryn da ósiredi. Qanattylardyń erekshelikterine qaraı jaǵdaı jasalǵan. Úırek-qazdarǵa haýyz salsa, bódenelerdi belgili bir temperatýra saqtalǵan ǵımaratta ustaıdy. Odan táýligine 800-ge deıin jumyrtqa alyp, saýdaǵa shyǵaryp otyr.
Fermer 6 ga aýmaqty alatyn qorasyna 123 mıllıon teńge qarajat jumsaǵan. Qojalyqta qustan bólek, túıe men qoıan bar. Sondaı-aq, jylyjaı sharýashylyǵyn da qolǵa alǵan. Qııar men qulpynaı ósiredi. Olarǵa tamshylatyp sýarý ádisin qoldanady. Aýlasyna 300 túp jemis aǵashyn da otyrǵyzǵan.
Mańǵystaýda balamasy joq sharýashylyqty dóńgeletip otyrǵan Boranbaı sharýa 20 adamdy turaqty jumyspen qamtyǵan. Búginde asqaq armany men maqsatyna jetý úshin etnoaýyl jobasyn bastap ketken. Qazirdiń ózinde 2 aǵash úıi tigýli. Sharýa bolashaqta kıiz úıdiń sanyn onnnan asyrýdy kózdeıdi.