Mańǵystaýda dalaǵa tógilgen munaıdan mal qyryldy – mınıstrlik oqıǵanyń mán-jaıyn túsindirdi

ASTANA. QazAqparat – Búgin áleýmettik jelide uńǵymadan shyqqan munaıdyń dalaǵa tógilip, saldarynan mańaıdaǵy tórt túliktiń qyrylyp jatqany kórsetilgen beınejazba jarııalandy. Osy oqıǵaǵa baılanysty Ekologııa jáne tabıǵı resýrstar mınıstrligi túsinik berdi, dep habarlaıdy QazAqparat tilshisi.

«Vıdeodada kórsetilgen Mańǵystaý aýdany Qaraqııa aýdanynyń Jetibaı aýylynyń shyǵys bóligine shamamen 10-15 shaqyrym jerde ornalasqan «Shalba» ýchaskesindegi «NSH – P1» uńǵymasynan 2020 jyly tógilgen munaıdyń emýlsııasy. Ol uńǵymanyń ıesi joq. Energetıka mınıstrligi «NSH – P1» uńǵymasyn qaıta aýktsıonǵa shyǵaryp, ony «ARK Petroleum» jaýapkershiligi shekteýli seriktestigi utyp alǵan. Tıisinshe, taǵaıyndalǵan operatorǵa qatysty jer qoınaýyn paıdalanýǵa arnalǵan kelisimshartpen tazalaý jáne rekýltıvatsııalaý jumystary qarastyrylýy tıis», - dep jaýap berdi mınıstrliktiń baspasóz qyzmetinen.

Vedomstvo málimetinshe, atalǵan uńǵyma boıynsha Ekologııa departamenti birneshe ret Energetıka mınıstrligine, Mańǵystaý oblystyq prokýratýrasyna jáne Polıtsııa departamentine tıisti hat joldanǵan.

«Jańa uńǵyma operatorynyń jer qoınaýyn paıdalanýǵa arnalǵan kelisimsharty daıyndalǵan ýaqytqa deıin departamenttiń usynysymen adam densaýlyǵyna zııan keltirmeý maqsatynda jáne úı janýarlarynyń qaýipsizdigin qamtamasyz etý úshin Qaraqııa aýdany ákimdigimen tógilgen munaı emýlsııalaryna ýaqytsha qorshaý jumystary uıymdastyrylǵan bolatyn. Sondaı-aq úı janýarynyń ıesi tórt túliktiń densaýlyǵyna qaýip tóndirýge, aınaladaǵylarǵa zııan keltirýge jol bermeıtin jaǵdaılardy qamtamasyz etýge mindetti», - dep málim etti Ekologııa mınıstrliginen.

Qaraýsyz qalǵan uńǵymaǵa jańa operator bekitilgennen keıin tazalaý jumystaryn júrgiziledi. Talaptardyń qatań saqtalýyn Mańǵystaý oblystyq Ekologııa departamenti baqylaýda ustaıdy.

Mınıstrlikten málimdegendeı, qazir oqıǵa ornynda mamandar tekserý jumystaryn júrgizip jatyr. Mal shyǵyny ázirge belgisiz.