Mańǵystaýda bıýdjet salasy qyzmetkerlerine arnalǵan jataqhana ashyldy
Eki ǵımarattan turatyn jataqhanada as úı, jýynatyn bólme, kireberis jáne zat saqtaıtyn qoımamen qatar, turmysqa qajettilerdiń barlyǵy bar.
Jalpy qurylys alańy shamamen 2,5 myń sharshy metrdi quraıdy. Jataqhana mańaıyndaǵy aýmaqty abattandyrý máselesi de umyt qalmaǵan. Ǵımarat aınalasynda jasyl jelek alań men jaıaý júrginshiler jolyna asfalt pen kespe tastar tóselgen.
«Elbasy «Bes áleýmettik bastama» atty halyqqa úndeýiniń birinshi bastamasynda «Árbir otbasyna baspana alýdyń jańa múmkindikterin berý» dep atap ótken bolatyn. Búgingi aýdandaǵy jasalynyp jatqan shara sonyń aıǵaǵy dep bilemin. Sonymen qatar, osy kompanııa 2017-2018 jyldar aralyǵynda Mańǵystaý aýylynan kitaphanasymen birge 500 oryndyq mádenıet úıi, Mańǵystaý aýylynda 160 oryndyq dene shynyqtyrý- saýyqtyrý kesheniniń qurylysy men Mańǵystaý-5 eldi mekeninen 15 shaqyrym avtokólik jolynyń qurylysyna 3 mıllıardtan astam qarajat bólip, Munaıly aýdanynyń áleýmettik damýyna óz úlesterin qosýda», dedi sharaǵa qatysqan oblys ákimi Eraly Toǵjanov.
Joba quny - 840 mıllıon teńge. Jataqhana qurylysy bir jylǵa jeter jetpes merzim ishinde aıaqtaldy.
«Bul jataqhana «NKOK» kompanııasy úshin mańyzdy áleýmettik jáne ınfraqurylymdyq jobalar sheńberinde salyndy. Sebebi, Konsortsıým mindeti jergilikti jurtshylyqtyń qajettilikterin tikeleı qamtý. Sonymen qatar, Konsortsıým bul aımaqtarda áleýmettik jobalarǵa úlken qajettilik bar ekenin eskere otyryp, Mańǵystaý jáne Atyraý oblystarynda birqatar qosymsha jobany júzege asyrýda», deıdi «NCOC» kompanııasynyń basqarýshy dırektory Brýno Jarden.
Munaıly aýdanyndaǵy jaǵymdy jańalyq munymen shektelmeıdi. Qyrkúıek aıynda aýdandaǵy Qyzyltóbe men Basqudyq aýyldarynda mektep ashylady dep josparlanýda.