Mańǵystaýda brakonerlerden 120 keli bekire tárkilendi

AQTAÝ. QazAqparat – Aqtaý - Fort-Shevchenko respýblıkalyq mańyzy bar tasjolynyń boıynda toqtatylǵan «Lada 2112» kóliginen 120 keli bekire balyǵy tárkilendi. Bul týraly Mańǵystaý oblystyq Polıtsııa departamentiniń baspasóz qyzmetinen málim etti, dep habarlaıdy QazAqparat tilshisi.

«Patrýldik polıtsııa rotasynyń qyzmetkerleri 10 naýryzda saǵat 23:00 shamasynda Aqtaý - Fort-Shevchenko respýblıkalyq mańyzy bar tasjolynyń 29-shaqyrymynda tabıǵatty qorǵaý polıtsııasymen birlesip «Lada 2112» markaly kúdikti avtokólikti toqtatty. Avtokólikti tekserý barysynda júksalǵyshta jalpy salmaǵy 124 keli bolatyn 33 dana zańsyz aýlanǵan bekire balyǵy tabylyp, tárkilendi», - delingen baspasóz málimetinde.

Polıtseıler 26 jastaǵy kúdikti azamatty ustady.

Bul derek QR Qylmystyq kodeksiniń 339-baby boıynsha Túpqaraǵan aýdany polıtsııa bóliminiń sotqa deıingi tergep-tekserýdiń biryńǵaı tizimine tirkelgen.

Tárkilengen balyq «Kazakh Osetr» kásipornyna tapsyryldy.