Mańǵystaýda bıyl jol apatynan 46 adam qaıtys bolǵan

AQTAÝ. QazAqparat – Mańǵystaýda jyl basynan beri 268 jol-kólik oqıǵasy bolyp, 46 adam kóz jumdy. 342 adam jaraqattandy. Bul týraly Mańǵystaý oblysy polıtsııa departamenti bastyǵynyń birinshi orynbasary Amangeldi Halmuradov málim etti, dep habarlaıdy QazAqparat tilshisi.

Aıtýynsha, jol-kólik oqıǵalary ótken jylmen salystyrǵanda eki ese kóbeıip otyr. Oqıǵalardyń basym bóligi jaıaý adamdarǵa qatysty. Atap aıtar bolsaq, jaıaý júrginshiler 128 jol oqıǵasyna ushyraǵan. Al, malǵa soǵý boıynsha 5 oqıǵa bolyp, 2 adam qaza tapty jáne 8 adam jaraqattandy.

«Qurmetti júrgizýshiler, jyldamdyq rejımin saqtaýlaryńyzdy, jol qozǵalysy erejelerin buzbaýlaryńyzdy, jaıaý júrginshilerden joldan ótý kezinde muqııat bolýlaryn, sharýa qojalyqtary ıelerinen úı janýarlaryn qaraýsyz jibermeýlerin, tórt túlikti jaryqqa shaǵylysatyn lentalarmen qamtamasyz etýlerińizdi suraımyz. Adam ómiri bárinen de qymbat. Sondyqtan, júrgizýshiler óziniń, jolaýshylardyń jáne ózge de jol qozǵalysy qatysýshylarynyń ómiri men densaýlyǵyna nemquraılylyq tanytpaǵandyǵy abzal», - dedi Amangeldi Halmuradov.