Mańǵystaýda bıyl túrik ınvestorlarynyń qatysýymen iri eki joba iske qosylady

AQTAÝ. QazAqparat - Mańǵystaýda jyl sońyna deıin túrik ınvestorlarynyń qatysýymen iri eki joba iske qosylady, dep habarlaıdy QazAqparat tilshisi. Bul týraly oblys ákimi Nurlan Noǵaevtyń Túrkııanyń Aqtaý qalasyndaǵy Bas konsýly Muzaffer Aqyldyrymdy qabyldaýynda belgili boldy.

Kezdesý barysynda Mańǵystaý oblysy men Túrkııa arasyndaǵy ekonomıkalyq baılanystardy odan ári nyǵaıtý máseleleri, ınvestıtsııalyq múmkindikter men óńiraralyq kásipkerlikti damytý perspektıvalary talqylandy.

Túrkııa óńirdiń syrtqy saýda baılanystarynda mańyzdy ról atqarady. Osy jyldyń qańtar-tamyz aralyǵynda oblys pen Túrkııa saýda aınalymy 93,1 mln dollardy qurady. Onyń ishinde eksport - 52,4 mln dollar.

Aıta ketsek, Mańǵystaý oblysynyń aýmaǵynda túrik kapıtalynyń qatysýymen ekonomıkanyń t úrli salalarynda 86 kásiporyn tirkelgen.

Sondaı-aq, osy jyldyń sońyna deıin Aqtaý irgesindegi «Jyly jaǵajaı» aýmaǵynda ınvestıtsııalyq quny 100 mlrd teńge bolatyn 2 jobany iske qosý josparlanyp otyr. «Saýda qalashyǵy» men «Golf-klýb» demalys kesheniniń ashylýy 200 adamdy turaqty jumyspen qamtýǵa múmkindik beredi.

Oblys ákimi jergilikti atqarýshy organ ókilderi eki el arasyndaǵy iskerlik baılanysty odan ári damytý úshin barynsha jumys isteıtinin jetkizdi.

Túrkııanyń Aqtaý qalasyndaǵy Bas konsýly da óz kezeginde jemisti áriptestikti ary qaraı jalǵastyrýǵa daıyn ekenin aıtty.