Mańǵystaýda aýylsharýashylyq basqarmasy basshysynyń orynbasary sottaldy

NUR-SULTAN. QazAqparat - Mańǵystaý oblysy Aýyl sharýashylyǵy basqarmasy basshysynyń burynǵy orynbasary para alǵany úshin sottaldy, dep habarlaıdy QazAqparat QR Sybaılas jemqorlyqqa qarsy is-qımyl agenttiginiń baspasóz qyzmetine silteme jasap.

«Aǵymdaǵy jyldyń 30 mamyrynda Aqtaý qalalyq sotynyń úkimimen Aýyl sharýashylyǵy basqarmasy basshysynyń burynǵy orynbasary Baqtybaı Іzimtaev kún panelderin jetkizýshilerden sýbsıdııa berý kezinde jalpy qamqorlyǵy úshin para alý faktisi boıynsha kináli dep tanylyp, oǵan 28 mıllıon teńge kóleminde aıyppul taǵaıyndaldy. Sonymen qatar, ol memlekettik organdarda qyzmet atqarý quqyǵynan ómir boıyna aıyryldy.

Sondaı-aq, kún panelderin jetkizýshiler Shynbolat Qumar, Jaqsylyq Aralbaev para bergeni úshin sottalyp, árqaısysyna 2,6 mıllıon teńge kóleminde aıyppul salyndy» delingen habarlamada.

Sonymen qatar, sot «Baısyrymov» JK ıesin jalǵan qujattardy usyný arqyly sýbsıdııa somasyn alǵan alaıaqtyq faktisi boıynsha kináli dep tanyp, oǵan 3 jylǵa bas bostandyǵyn shekteý taǵaıyndady.

Sottalǵandardyń qylmystyq is-áreketi nátıjesinde memleketke 6,9 mıllıon teńge kóleminde zalal keltirildi.